ചാത്തന്നൂർ: വാഹനാപകടത്തിൽപ്പെട്ട യുവാവിനെ ഇത്തിക്കരയാറ്റിൽ മരിച്ച നിലയിൽ കണ്ടെത്തി. ചാത്തന്നൂർ കോയിപ്പാട് ശ്രീവിലാസത്തിൽ വിജയന്റെ മകൻ ഐവിനെയാണ് (32) പള്ളിയ്ക്കമണ്ണടി പാലത്തിന് സമീപം ആറ്റിൽ മരിച്ച നിലയിൽ കണ്ടെത്തിയത്.

പൊലീസ് പറയുന്നത്: 18ന് രാവിലെ പത്തരയോടെ വീട്ടിൽ നിന്ന് കാറുമായി കടയിൽ പോകാനിറങ്ങിയ ഐവിന്റെ കാർ കുമ്മലൂരിൽ വച്ച് മതിലിൽ ഇടിച്ചിരുന്നു. വിവരം വീട്ടിലേക്ക് ഫോൺ വിളിച്ച് അറിയിച്ചു. വീട്ടുകാർ തിരികെ വിളിച്ചപ്പോൾ ഫോണെടുക്കാതിരിക്കുകയും തുടർന്ന് ഫോൺ സ്വിച്ച് ഒഫ് ആകുകയുമായിരുന്നു.

തെരച്ചിലിനൊടുവിൽ വീട്ടുകാർ ചാത്തന്നൂർ പൊലീസിൽ പരാതി നൽകി. ഇന്നലെ രാവിലെ 8 ഓടെ പള്ളിക്കമണ്ണടി കടവിന് സമീപമാണ് ജഡം കണ്ടെത്തിയത്. പാരിപ്പള്ളി മെഡിക്കൽ കോളേജിൽ കൊവിഡ് ടെസ്റ്റ്‌ നടത്തി പോസ്റ്റ്‌മോർട്ടത്തിന് ശേഷം മൃതദേഹം ബന്ധുക്കൾക്ക് വീട്ടുകൊടുത്തു.