കൊല്ലം: കൊവിഡ് മാനദണ്ഡങ്ങൾ പാലിക്കാതെ തുറന്ന് പ്രവർത്തിപ്പിച്ച 31 വ്യാപാര സ്ഥാപനങ്ങൾക്കെതിരെ പൊലീസ് കേസെടുത്തു. ശുചീകരണ സംവിധാനങ്ങൾ ഒരുക്കാതെയും സാമൂഹിക അകലം പാലിക്കാതെയും പ്രവർത്തിപ്പിച്ച് സ്ഥാപനങ്ങളുടെ ഉടമകൾക്കെതിരെയാണ് കേസെടുത്ത് പിഴ ഈടാക്കിയത്. 28 സ്ഥാപനങ്ങൾക്കെതിരെ കൊല്ലം സിറ്റി പൊലീസും ബാക്കി റൂറൽ പൊലീസുമാണ് നടപടിയെടുത്തത്. ഓണതിരക്കിലേക്ക് വിപണി കടന്ന സാഹചര്യത്തിൽ വ്യാപാര സ്ഥാപനങ്ങൾ കേന്ദ്രീകരിച്ച് കൂടുതൽ പരിശോധന നടത്താൻ പൊലീസ് പട്രോളിംഗ് ശക്തമാക്കി. പൊതു ഇടങ്ങളിൽ മാസ്ക് ധരിക്കാതെ യാത്ര നടത്തിയ 369 പേർക്കെതിരെയും ജില്ലയിലെ വിവിധ പൊലീസ് സ്റ്റേഷനുകളിൽ കേസ് രജിസ്റ്റർ ചെയ്തു. 238 പേർ‌ക്കെതിരെ കൊല്ലം സിറ്റി പൊലീസാണ് കേസെടുത്ത്. കൊവിഡ് മാനദണ്ഡങ്ങളുടെ ലംഘനവുമായി ബന്ധപ്പെട്ട് 318 പേർക്കെതിരെ കേസെടുത്ത് പിഴ ഈടാക്കി. 274 പേർക്കെതിരെ കൊല്ലം സിറ്റി പൊലീസാണ് നടപടിയെടുത്തത്. അനാവശ്യ യാത്രകൾക്കും നിയമ ലംഘനങ്ങൾക്കും ഉപയോഗിച്ച 22 വാഹനങ്ങൾ പിടിച്ചെടുത്ത് ഉടമകളിൽ നിന്ന് പിഴ ഈടാക്കി.