കൊല്ലം: മാസ്ക് ധരിക്കാതെ പൊതു ഇടങ്ങളിൽ യാത്രചെയ്ത് 408 പേർക്കെതിരെ ജില്ലയിലെ വിവിധ പൊലീസ് സ്റ്റേഷനുകളിൽ കേസ് രജിസ്റ്റർ ചെയ്തു. 279 പേർക്കെതിരെ സിറ്റി പൊലീസും ബാക്കി റൂറൽ പൊലീസുമാണ് കേസെടുത്ത് പിഴ ഈടാക്കിയത്. കൊവിഡ് മാനദണ്ഡങ്ങൾ ലംഘിച്ച 295 പേർക്കെതിരെയാണ് കഴിഞ്ഞ ദിവസം കേസെടുത്തത്. അനാവശ്യ യാത്രകൾക്കും നിയമ ലംഘനങ്ങൾക്കും ഉപയോഗിച്ച 19 വാഹനങ്ങൾ സിറ്റി പൊലീസ് പിടിച്ചെടുത്ത് ഉടമകളിൽ നിന്ന് പിഴ ഈടാക്കി. കൊവിഡ് മാനദണ്ഡങ്ങൾ പാലിക്കാതെ തുറന്ന് പ്രവർത്തിപ്പിച്ച ജില്ലയിലെ 25 വ്യാപാര സ്ഥാപനങ്ങൾക്കെതിരെയും പൊലീസ് നടപടിയെടുത്തു. സാമൂഹിക അകലം പാലിക്കാതെയും ശുചീകരണ സംവിധാനങ്ങൾ ഒരുക്കാതെയും തുറന്ന് പ്രവർത്തിച്ച സ്ഥാപനങ്ങൾക്കെതിരെയാണ് കേസെടുത്തത്.