തൊ​ടി​യൂർ: നാലുവയസുകാരൻ ആദം അലി മുഹമ്മദ് നാടറിയുന്ന അറിവിന്റെ നിറകുടമാണ്. 196 രാ​ജ്യ​ങ്ങ​ളു​ടെ പേ​രും അ​വ​യു​ടെ ത​ല​സ്ഥാ​ന​ങ്ങ​ളും ഇന്ത്യയിലെ 29 സംസ്ഥാനങ്ങളും അവയുടെ തലസ്ഥാനങ്ങളും കേന്ദ്രഭരണ പ്രദേശങ്ങളുമെല്ലാം ഈ മിടുക്കന് കാണാപ്പാഠം.

രാ​ഷ്ട്ര​പ​തി, പ്ര​ധാ​ന​മ​ന്ത്രി തുടങ്ങി സംസ്ഥാനങ്ങളിലെ മുഖ്യമന്ത്രിമാരുടെ പേരുകൾ,​ ദേശീയപക്ഷി, മൃഗം എന്നിങ്ങനെ എന്ത് ചോദിച്ചാലും ഉത്തരം മണിമണിപോലെ പറയും. വെ​ളു​ത്ത​മ​ണലിൽ ജ​ന​സേ​വ​ന കേ​ന്ദ്രം ന​ട​ത്തുന്ന തൊ​ടി​യൂർ ഇ​ട​ക്കു​ള​ങ്ങ​ര അ​ഫ്‌​സൽ വി​ല്ല​യിൽ അൻ​വർ​സാ​ദ​ത്തിന്റെ​യും ഫാർ​മ​സി​സ്റ്റാ​യ വാ​ഹി​ദ​യു​ടെ​യും മൂ​ന്നു മ​ക്ക​ളിൽ ഇ​ള​യ​വ​നാ​ണ് ആ​ദം.

വാ​ഹി​ദ മൂ​ത്ത കു​ട്ടി​ക​ളെ പഠി​പ്പി​ക്കു​മ്പോൾ രണ്ട് വയസ് മുതൽ ആ​ദ​മും ഒ​പ്പം​കൂ​ടും. ഉ​റ​ങ്ങാൻ കി​ട​ക്കുമ്പോൾ പഠി​പ്പി​ച്ച പാഠഭാ​ഗ​ങ്ങ​ളിൽ നി​ന്നു​ള്ള ചോ​ദ്യ​ങ്ങൾ ചോ​ദി​ക്കും. അ​വർ ഉ​ത്ത​രം പ​റ​യും​ മു​മ്പ് കു​ഞ്ഞ് ആ​ദം ഉ​ത്ത​രം​ പ​റ​യും. ഇ​ത് പ​തി​വാ​യ​തോ​ടെ​യാ​ണ് ആ​ദ​ത്തി​ന്റെ ക​ഴി​വ് മാ​താ​പി​താ​ക്കൾ ​തി​രി​ച്ച​റി​ഞ്ഞ​ത്. തു​ടർ​ന്നു​ള്ള പ​രി​ശീ​ല​നം ആ​ദം​മു​ഹ​മ്മ​ദിൽ വി​ജ്ഞാ​ന​ത്തി​ന്റെ ക​ല​വ​റ ഒ​രു​ക്കു​ക​യാ​യി​രു​ന്നു. പി​താ​വ് അൻ​വർ​ സാ​ദ​ത്ത് രാ​ജ്യ​ത്തി​ന്റെ​ പേ​ര് വാ​യി​ക്കുമ്പോൾ ത​ല​സ്ഥാ​നം ഏ​താണെന്ന് ആ​ദം സെക്കൻഡുകൾക്കകം പ​റ​യും.
പൊ​തു​വേ​ദി​ക​ളി​ലും ടി.വി ചാ​ന​ലു​ക​ളി​ലും ഇ​തി​ന​കം തന്നെ ആദം മിന്നും പ്ര​ക​ട​നം കാഴ്ചവച്ചു. എ​ട്ടാം ക്ലാ​സ് വി​ദ്യാർ​ത്ഥി​യാ​യ സ​ഹോ​ദ​രി അ​ഷ്​ഫി​യ അൻ​വർ ഗാ​യി​ക​യും പാ​ടാം​ന​മു​ക്ക് പാ​ടാം​ റി​യാ​ലി​റ്റി ഷോ​യിൽ സെ​മി ഫൈ​ന​ലി​സ്റ്റും ജൂ​നി​യർ മോ​ഡൽ ഇന്റർ​നാ​ഷ​ണ​ലി​ലെ ഇ​ന്ത്യൻ ഫൈ​ന​ലി​സ്റ്റു​മാ​ണ്. ആ​റാം ക്ലാ​സ് വി​ദ്യാർ​ത്ഥി​യാ​യ സ​ഹോ​ദ​രൻ അ​ഫ്‌​സൽ മു​ഹ​മ്മ​ദ് സ്‌​കേ​റ്റിം​ഗിൽ തു​ടർ​ച്ച​യാ​യി ര​ണ്ടു​മ​ണി​ക്കൂർ പ​ങ്കെ​ടു​ത്ത് ഇന്റർ​നാ​ഷ​ണൽ ബു​ക്ക് ഒ​ഫ് റെ​ക്കാർ​ഡ്സിൽ ഇടം പിടിച്ചിട്ടുണ്ട്.