 145 പേർക്ക് സമ്പർക്കത്തിലൂടെ

 53 പേർക്ക് രോഗമുക്തി

കൊല്ലം: ജില്ലയിൽ 151 പേർക്കുകൂടി കൊവിഡ് സ്ഥിരീകരിച്ചു. ഇതിൽ വിദേശത്ത് നിന്നെത്തിയ 4 പേരും ഇതര സംസ്ഥാനങ്ങളിൽ നിന്നെത്തിയ രണ്ട് പേരും ഉൾപ്പെടുന്നു. 3 ആരോഗ്യ പ്രവർത്തകർ ഉൾപ്പടെ 145 പേർക്ക് സമ്പർക്കത്തിലൂടെയാണ് രോഗം പടർന്നത്. ഇന്നലെ ജില്ലയിൽ 53 പേർ രോഗമുക്തരായി. ഇതോടെ കൊവിഡ് ബാധിച്ച് ജില്ലയിൽ ചികിത്സയിലുള്ളവരുടെ എണ്ണം 1476 ആയി. കൊല്ലത്തെ സ്വകാര്യ ആശുപത്രിയിലെ ജീവനക്കാരിയായ ചാത്തന്നൂർ താഴം സ്വദേശിനി, കൊല്ലത്തെ സർക്കാർ ആശുപത്രിയിലെ ജീവനക്കാരിയായ കാവനാട് ആൽത്തറ മൂട് സ്വദേശിനി, കൊട്ടാരക്കരയിലെ സർക്കാർ ആശുപത്രിയിലെ ജീവനക്കാരിയായ എഴംകുളം ഏനാത്ത് സ്വദേശിനി എന്നിവരാണ് കൊവിഡ് ബാധിച്ച ആരോഗ്യപ്രവർത്തകർ. പെരിനാട് വെള്ളിമൺ, പവിത്രേശ്വരം പായിക്കോണം, നീണ്ടകര വേട്ടുതറ, കൊല്ലം നഗരത്തിലെ വിവിധ ഭാഗങ്ങൾ, ആലപ്പാട് വെള്ളനാതുരുത്ത് എന്നിവിടങ്ങളിലാണ് ഏറ്റവും കൂടുതൽ പേർക്ക് രോഗം ബാധിച്ചത്.