തൃശൂർ: മുളങ്കുന്നത്തുകാവ് പഞ്ചായത്തിലെ പൂമല ഡാമിന്റെ വൃഷ്ടി പ്രദേശങ്ങളിൽ തുടർച്ചയായി മഴ പെയ്യുന്നതിനാൽ ഡാമിന്റെ ജലനിരപ്പ് 28 അടി ആകുമ്പോൾ ഷട്ടറുകൾ തുറക്കാൻ കളക്ടർ ഉത്തരവിട്ടു. 26 അടി 10 ഇഞ്ചാണ് നിലവിലുള്ള ജലനിരപ്പ്. രാവിലെ ആറ് മുതൽ വൈകീട്ട് നാല് വരെയുള്ള സമയത്തിനിടയ്ക്ക് വെള്ളം തുറന്നുവിടാൻ മൈനർ ഇറിഗേഷൻ എക്‌സിക്യൂട്ടിവ് എൻജിനിയർക്ക് കളക്ടർ നിർദേശം നൽകി. ഷട്ടറുകൾ തുറന്ന് മലവായി തോട്ടിലേക്ക് വെള്ളം ഒഴുക്കുന്നതിന്റെ ഭാഗമായി പുഴയിലെ ജലനിരപ്പ് ഉയരാൻ സാദ്ധ്യതയുണ്ട്. പുഴയിൽ മത്സ്യബന്ധനത്തിനും അനുബന്ധ പ്രവർത്തനങ്ങൾക്കും നിയന്ത്രണം ഏർപ്പെടുത്തിയതായും ജനങ്ങൾ ജാഗ്രത പാലിക്കണമെന്നും കളക്ടർ അറിയിച്ചു.