തൃശൂർ: രാഷ്ട്രീയ താത്പര്യങ്ങൾക്ക് വഴങ്ങാത്തവരെ കൈയേറ്റം ചെയ്യുകയും അപമാനിക്കുകയുമാണ് സി.പി.എം ചെയ്യുന്നതെന്ന് ടി.എൻ പ്രതാപൻ എം.പി പറഞ്ഞു. വില്ലേജ് ഓഫീസർ സീമയെ ആശുപത്രിയിൽ സന്ദർശിച്ച ശേഷം മാദ്ധ്യമങ്ങളോട് സംസാരിക്കുകയായിരുന്നു അദ്ദേഹം. വില്ലേജ് ഓഫീസറെ ആത്മഹത്യക്ക് പ്രേരിപ്പിച്ചതിന് പഞ്ചായത്ത് പ്രസിഡന്റ്, അംഗങ്ങൾ എന്നിവർക്കെതിരെ കേസെടുക്കണമെന്നും എം.പി ആവശ്യപ്പെട്ടു. അതേസമയം വില്ലേജ് ഓഫീസർ ആത്മഹത്യക്ക് ശ്രമിച്ച സംഭവത്തിൽ സി.പി.എം അംഗങ്ങൾക്കും പഞ്ചായത്ത് പ്രസിഡന്റിനുമെതിരെ ആത്മഹത്യാപ്രേരണയ്ക്കും മാനസിക പീഡനത്തിനും കേസെടുത്ത് അറസ്റ്റ് ചെയ്യണമെന്ന് ബി.ജെ.പി സംസ്ഥാന സെക്രട്ടറി എ. നാഗേഷ് ആവശ്യപ്പെട്ടു. കുറ്റക്കാർക്കെതിരെ ശക്തമായ നിയമ നടപടി സ്വീകരിക്കണമെന്ന് എൻ.ജി.ഒ അസോസിയേഷൻ ജില്ലാ കമ്മിറ്റി ആവശ്യപ്പെട്ടു.