തൃശൂർ: സംസ്ഥാനത്തെ മികച്ച പൊലീസ് സ്റ്റേഷനായി മണ്ണുത്തിയെ തിരഞ്ഞെടുത്തു. മത്സരത്തിൽ പത്തനംതിട്ട പൊലീസ് സ്റ്റേഷനൊപ്പം മണ്ണുത്തി പൊലീസ് സ്റ്റേഷൻ ഒന്നാം സ്ഥാനം പങ്കിടുകയായിരുന്നു. കേന്ദ്ര ആഭ്യന്തര മന്ത്രാലയവും കേരളത്തിലെ ഏറ്റവും നല്ല പൊലീസ് സ്റ്റേഷനായി തിരഞ്ഞെടുത്തത് തൃശൂർ ജില്ലയിലെ ഒല്ലൂർ പൊലീസ് സ്റ്റേഷനെയായിരുന്നു.
മികച്ച പൊലീസ് സ്റ്റേഷനുള്ള മുഖ്യമന്ത്രിയുടെ ട്രോഫി മണ്ണുത്തിക്ക് സമ്മാനിക്കും. കോട്ടയം ജില്ലയിലെ പാമ്പാടി പൊലീസ് സ്റ്റേഷൻ രണ്ടാം സ്ഥാനവും തിരുവനന്തപുരം ജില്ലയിലെ തമ്പാനൂർ പൊലീസ് സ്റ്റേഷൻ മൂന്നാം സ്ഥാനവും നേടി. മുഖ്യമന്ത്രിയുടെ ട്രോഫി കരസ്ഥമാക്കിയ മണ്ണുത്തി പൊലീസ് സ്റ്റേഷനിലെ മുഴുവൻ ഉദ്യോഗസ്ഥരെയും അഭിനന്ദിക്കുന്നതായി സിറ്റി പൊലീസ് കമ്മിഷണർ ആർ. ആദിത്യ അറിയിച്ചു.
പരിഗണിച്ചത്
സംസ്ഥാനത്തെ പൊലീസ് സ്റ്റേഷനുകളുടെ പ്രവർത്തനങ്ങളിലെ ഗുണനിലവാരം, ശാസ്ത്രസാങ്കേതിക സൗകര്യങ്ങളുടെ ഉപയുക്തത, കേസന്വേഷണങ്ങളിലെ സമയബന്ധിത തീർപ്പാക്കൽ, പൊലീസ് സ്റ്റേഷൻ കെട്ടിടത്തിനകത്തും പരിസരത്തുമുള്ള വൃത്തിയായ അന്തരീക്ഷം തുടങ്ങിയ വിവിധ ഘടകങ്ങളാണ് പുരസ്‌കാര നിർണയത്തിന് പരിഗണിച്ചത്.