മാള: നാടിനു വേണ്ടി ഒരു ലോക റെക്കാഡ് കരസ്ഥമാക്കിയ അഭിമാനത്തിലാണ് ഏഴു വർഷമായി ഖത്തറിൽ താമസിക്കുന്ന പ്രജീത് രാമകൃഷ്ണനും ഭാര്യ ആരതി രാധാകൃഷ്ണനും കുടുംബവും. വിദ്യാർത്ഥി ആയിരിക്കുന്ന കാലം തൊട്ടേ സംഗീതം ഹൃദയത്തിൽ കൊണ്ടു നടക്കുന്ന പ്രജിത്തിന്റെ കേവലം ഒരു പരീക്ഷണ സംഗീത ആൽബം മാത്രമായിരുന്നില്ല " ബോലോ ഭാരത് മാതാ കി". 106 കുട്ടികൾ ഒന്നിച്ച് ദേശീയ ഗാനം ആലപിച്ച് ഒരുക്കിയ സംഗീത ആൽബം ഷോർട്ടെസ്റ്റ് വീഡിയോ വിത്ത് മോസ്റ്റ് നമ്പർ ഒഫ് ഓഡിയോ ആൻഡ് വീഡിയോ ട്രാക്ക്സ് ഇൻക്ലൂഡഡ് ഇൻ എ സിംഗിൾ ലൈൻ എന്ന പേരിൽ 2020 ലോക റെക്കാഡിന്റെ നെറുകയിലെത്തി. മക്കളായ ആദ്യ പ്രജിത്തും അക്ഷിത പ്രജിത്തും ഉൾപ്പെടെയുള്ള കുരുന്നുകളെ സൗഹൃദവലയത്തിൽ നിന്നും കണ്ടെത്തി. ദുരന്ത കാലത്ത് ലോകത്തിന്റെ വിവിധയിടങ്ങളിൽ നിന്നുള്ള കുട്ടികളെ ഒരു കുടക്കീഴിൽ അണിനിരത്താനുള്ള ഉത്തരവാദിത്വം മുഖ്യ സംഘാടകയായ ആരതിക്കായിരുന്നു. ഇന്ത്യ, യു.കെ, ബംഗ്ലാദേശ്, കുവൈറ്റ്,​ ഖത്തർ, ജർമനി, ബഹറിൻ, യു.എ.ഇ എന്നിവിടങ്ങളിലെ കുട്ടികളെ ഒരേ താളത്തിൽ പാടി പഠിപ്പിക്കുകയും ഓരോ കുട്ടിയുടെയും ഏറ്റവും മികച്ച ഓഡിയോ ട്രാക്ക്, സാങ്കേതിക വിഭാഗം കൈകാര്യം ചെയ്യുന്ന പ്രജിത്തിന് നൽകുകയെന്ന ഉത്തരവാദിത്വവും ആരതി നിർവഹിച്ചു. 162 ഓഡിയോ ട്രാക്കുകളും 118 വീഡിയോ ട്രാക്കുകളും സംയോജിപ്പിച്ചായിരുന്നു സംഗീത ശിൽപം ഒരുക്കിയത്.