തൃശൂർ: കൊവിഡ് വ്യാപനത്തെ തുടർന്ന് അഴീക്കോട് ഫിഷ് ലാൻഡിംഗ് സെന്റർ അടച്ചു. അഴീക്കോട് ഫിഷ് ലാൻഡിംഗ് സെന്റർ കേന്ദ്രീകരിച്ച് കൊവിഡ് പോസിറ്റീവ് റിപ്പോർട്ട് ചെയ്ത സാഹചര്യത്തിലാണ് ലാൻഡിംഗ് സെന്ററിൽ മത്സ്യബന്ധനവും മാർക്കറ്റും അനുബന്ധ പ്രവർത്തനങ്ങളും താത്കാലികമായി നിറുത്തിവയ്ക്കാൻ കളക്ടർ നിർദേശം നൽകിയത്. അഴീക്കോട് റീജ്യണൽ ഷ്രിംപ് ഹാച്ചറിക്ക് അടുത്തുള്ള പ്രൈവറ്റ് ഐസ് പ്ലാന്റിലെ അഞ്ച് പേർക്കാണ് കൊവിഡ് പോസിറ്റീവ് സ്ഥിരീകരിച്ചത്. ഇതിന്റെ അടിസ്ഥാനത്തിൽ ഹാച്ചറിയുടെ പ്രവർത്തനവും നിറുത്തി. അതേസമയം ഹാച്ചറിയിലെ ജീവനക്കാർക്ക് ഹാച്ചറിയിൽ എത്തി പ്രവർത്തനങ്ങൾ ഏകോപിപ്പിക്കുന്നതിനു തടസ്സമുണ്ടാക്കാത്ത രീതിയിൽ ക്രമീകരണങ്ങൾ ഏർപ്പെടുത്തും.