ചിറയിൻകീഴ്: ദുബായിൽ ഏപ്രിൽ 28 ന് രാവിലെ നടക്കാനിറങ്ങവെ കാണാതായ ചിറയിൻകീഴ് പെരുങ്ങുഴി ഇടഞ്ഞുംമൂല പ്രസന്നഭവനിൽ ദേവകുമാറിന്റെ (50) മൃതദേഹം ദെയ്റ ബീച്ചിൽ നിന്ന് ദുബായ് പൊലീസ് കണ്ടെടുത്തു. പെരുങ്ങുഴി മണ്ണീർവിളാകം കുടുംബാംഗം പരേതരായ എം.കെ.ശ്രീധരൻ - റിട്ട. ഹെഡ്മിസ്ട്രസ് എൻ.വസുമതി ദമ്പതികളുടെ മകനാണ്. ശ്രീകുമാർ പെരുങ്ങുഴി (സെക്രട്ടറി, എസ്.എൻ.ഡി.പി യോഗം ചിറയിൻകീഴ് താലൂക്ക് യൂണിയൻ), അഡ്വ.എസ്.കൃഷ്ണകുമാർ (ഡി.സി.സി ജനറൽ സെക്രട്ടറി), എസ്.പ്രസന്നകുമാർ എന്നിവർ സഹോദരങ്ങളാണ്. കൊല്ലം ഡി.സി.സി പ്രസിഡന്റ് അഡ്വ.ബിന്ദു കൃഷ്ണയുടെ ഭർതൃസഹോദരൻ കൂടിയാണ്.

ഹോട്ടൽ അറ്റ്ലാന്റയിൽ യൂറോപ്പ് റെന്റ് എ കാർ വിഭാഗത്തിൽ സൂപ്പർവൈസറായിരുന്ന ദേവകുമാറിനെ ദെയ്റ നായിഫ് മുതിനയിലെ ഫ്ലാറ്റിൽ നിന്നു പ്രഭാത സവാരിക്കിടെയാണു കാണാതായത്. മുങ്ങിമരണമാണെന്ന് സംശയിക്കുന്നതായി ബന്ധുക്കളെ ദുബായ് പൊലീസ് അറിയിച്ചു.

സംസ്കാരം ഇന്ന് വൈകിട്ട് നാലിന് ദുബായ് ഷെയ്ക് സയീദ് റോഡിലെ ജബൽ അലി ശ്മശാനത്തിൽ നടക്കും. തുടർന്ന് മരണാനന്തരചടങ്ങുകൾ വൈകിട്ടു അഞ്ചിനു തോന്നയ്ക്കൽ സഫാ ഓഡിറ്റോറിയത്തിനു സമീപം വാലികോണം റോഡിലെ ദേവരാഗത്തിൽ. ഭാര്യ.ജയകുമാരി. മക്കൾ: വിദ്യാർത്ഥികളായ അനഘ ജെ.ദേവ്, കൗശിക് ജെ.ദേവ്.