വെള്ളറട: പാൽ എടുക്കാത്തതിനെ ചൊല്ലിയുള്ള തർക്കത്തിൽ ക്ഷീര കർഷകൻ ജീവനക്കാരിയെ മർദ്ദിച്ചതായി പരാതി. കൈക്ക് പൊട്ടൽ സംഭവിച്ച ജീവനക്കാരി ആശുപത്രിയിലാണ്. പൂഴനാട് ക്ഷീരോൽപ്പാദന സഹകരണ സംഘത്തിലെ ജീവനക്കാരി രോഹിണിയെയാണ് ക്ഷീര കർഷകൻ മോഹൻ മർദ്ദിച്ചതായി പറയുന്നത്. കണ്ടെയ്ൻമെന്റ് സോണിൽ നിന്നു എത്തിക്കുന്ന പാൽ വേണ്ടത്ര സുരക്ഷിതമായല്ല കൊണ്ടുവരുന്നതെന്ന ആരോപണമുയർന്നിരുന്നു. ഇതിന്റെ അടിസ്ഥാനത്തിൽ പാൽ തൽക്കാലം ശേഖരിക്കേണ്ടെന്ന് ഭരണസമിതി തീരുമാനിച്ചിരുന്നു. ഇതേ ചൊല്ലിയുള്ള തർക്കമാണ് വാക്കേറ്റത്തിലും കൈയാങ്കളിയിലും കലാശിച്ചത്. രോഹിണി ആര്യങ്കോട് പൊലീസിൽ പരാതി നൽകി.