കല്ലമ്പലം: നാവായിക്കുളം ശ്രീ ശങ്കരനാരായണ സ്വാമി ക്ഷേത്രത്തിന്റെ ആറാട്ട്കടവ് ഉൾപ്പെടുന്ന നാവായിക്കുളം വലിയകുളം ഡി.വൈ.എഫ്.ഐയുടെ നേതൃത്വത്തിൽ ശുചീകരിച്ചു. ശങ്കരനാരായണ ക്ഷേത്രക്കുളം എന്നറിയപ്പെടുന്ന ഈ കുളത്തിലെ വെള്ളത്തിൽ ദുർ​ഗന്ധം അനുഭവപ്പെട്ടതിനെ തുടർന്ന് കക്കൂസ് മാലിന്യം കലർന്നിട്ടുണ്ടോ എന്നറിയാൻ ജലം പരിശോധിച്ചിരുന്നു. പരിശോധനയിൽ കക്കൂസ് മാലിന്യമല്ല കുളത്തിലെ പായലും ചെളിയുമാണ് ദുർ​ഗന്ധത്തിന് കാരണമെന്ന് കണ്ടെത്തുകയായിരുന്നു. തുടർന്ന് ഡി.വൈ.എഫ്.ഐ കിഴക്കേനട യൂണിറ്റ് പ്രവർത്തകരുടെ നേതൃത്വത്തിൽ കുളത്തിലെ പായലും ചെളിയും നീക്കം ചെയ്ത് കുളം ശുചീകരിക്കാൻ തീരുമാനിക്കുകയായിരുന്നു. ശുചീകരണ പ്രവർത്തികളുടെ ഉദ്​ഘാടനം വി. ജോയി എം.എൽ.എ നിർവഹിച്ചു. പഞ്ചായത്തം​ഗം ബി.കെ. പ്രസാദ് അദ്ധ്യക്ഷനായി. രാ​ഗേഷ് സ്വാ​ഗതം പറഞ്ഞു. ജി. വിജയകുമാർ, എസ്. ഹരിഹരൻ പിള്ള, മനു, നിതിൻ, ഹജീർ, രാധാകൃഷ്ണൻ നായർ, സനൽകുമാർ തുടങ്ങിയവർ പങ്കെടുത്തു.