തിരുവനന്തപുരം: മാദ്ധ്യമപ്രവർത്തകൻ കെ.എം.ബഷീർ ഐ.എ.എസ് ഓഫീസർ ശ്രീറാം വെങ്കിട്ടരാമൻ ഓടിച്ച കാറിടിച്ച് മരണപ്പെട്ട കേസിൽ സ്‌പെഷ്യൽ പ്രോസിക്യൂട്ടറെ നിയമിക്കണമെന്ന് പത്രപ്രവർത്തക യൂണിയൻ ജില്ലാ കമ്മിറ്റിയും തിരുവനന്തപുരം പ്രസ് ക്ലബും സർക്കാരിനോട് ആവശ്യപ്പെട്ടു. പ്രസ് ക്ലബിൽ നടന്ന കെ.എം.ബഷീറിന്റെ ഒന്നാം അനുസ്മരണ യോഗത്തിലാണ് ആവശ്യമുയർന്നത്. കെ.യു.ഡബ്ല്യു.ജെ ജില്ലാ പ്രസിഡന്റ് സുരേഷ് വെള്ളിമംഗലം അദ്ധ്യക്ഷനായി. പ്രസ് ക്ലബ് സെക്രട്ടറി സാബ്‌ളൂ തോമസ് അനുസ്മരണ പ്രമേയം അവതരിപ്പിച്ചു. മീഡിയ അക്കാഡമി ചെയർമാൻ ആർ.എസ്. ബാബു, കെ.യു.ഡബ്ല്യു.ജെ സംസ്ഥാന പ്രസിഡന്റ് കെ.പി. റെജി, സെക്രട്ടറി ടി.പി. പ്രശാന്ത്, സിറാജ് യൂണിറ്റ് ചീഫ് സൈഫുദീൻ ഹാജി, മുതിർന്ന മാദ്ധ്യമപ്രവർത്തകരായ വി. പ്രതാപചന്ദ്രൻ, യു. വിക്രമൻ, ആർ. അജിത് കുമാർ, നിസാർ മുഹമ്മദ്, അരവിന്ദ് എസ്. ശശി, അജിത് ലോറൻസ്, ബിജു ചന്ദ്രശേഖർ, മാർഷൽ വി. സെബാസ്റ്റ്യൻ, വി.വി. അരുൺ, അനുപമ ജി. നായർ, എസ്. ശ്രീജിത്ത് തുടങ്ങിയവർ സംസാരിച്ചു. കെ.യു.ഡബ്ല്യു.ജെ സെക്രട്ടറി ബി.അഭിജിത് സ്വാഗതം പറഞ്ഞു.