ഭരതൻ സംവിധാനം ചെയ്ത വൈശാലി ഇന്നും മലയാളികൾക്ക് പ്രിയപ്പെട്ട സിനിമകളിൽ ഒന്നാണ്. ചിത്രത്തിലെ നായകനും നായികയും അന്യഭാഷക്കാരായിരുന്നിട്ടും മലയാളികൾ നെഞ്ചിലേറ്റിയ ചിത്രം. വൈശാലിയിലെ ഈ കണ്ടുമുട്ടൽ ഇവരുടെ ജീവിതത്തിലെ വഴിത്തിരിവ് കൂടിയായിരുന്നു. പത്തുവർഷം നീണ്ട പ്രണയത്തിനൊടുവിൽ സഞ്ജയും സുപർണയും ജീവിതത്തിലും ഒന്നാവുകയായിരുന്നു. പക്ഷേ അധികനാൾ ഈ ബന്ധം തുടർന്നില്ല. വിവാഹമോചിതരായെങ്കിലും ഇരുവരും തമ്മിലുള്ള സൗഹൃദത്തിന് ഇപ്പോഴും കോട്ടം തട്ടിയിട്ടില്ല. ഒരു ചാനൽ പരിപാടിയിൽ ഒന്നിച്ചെത്തിയ ഇരുവരും തങ്ങളുടെ വിശേഷങ്ങൾ പങ്കുവച്ചിരുന്നു. സഞ്ജയുമായുള്ള ബന്ധത്തെക്കുറിച്ചും വൈശാലിയിലേക്ക് എത്തിയതിനെക്കുറിച്ചും സുപർണ തുറന്നു പറഞ്ഞു. "ബാലതാരമായി ഏതാനും സിനിമകളിൽ അഭിനയിച്ചിട്ടുണ്ട്. അങ്ങനെയാണ് ഭരതൻ സാർ എന്നെക്കുറിച്ച് അറിയുന്നത്. അദ്ദേഹം എന്നെ കാണാൻ വരുന്നത് എന്റെ 16-ാമത്തെ ജന്മദിനത്തിന്റെ പിറ്റേദിവസമാണ്. സിനിമയെക്കുറിച്ച് പറഞ്ഞപ്പോൾ ആദ്യം ഞാൻ ചോദിച്ചത് എനിക്ക് മലയാളം അറിയില്ല എങ്ങനെ അഭിനയിക്കുമെന്നാണ്? അതൊന്നും സാരമില്ല ഞാൻ നോക്കിക്കോളാമെന്ന് അദ്ദേഹം പറഞ്ഞു. പിന്നീടാണ് എന്നെ കാണുന്നതിന് മുമ്പ് തന്നെ എന്റെ രൂപം അദ്ദേഹം സ്‌കെച്ച് ചെയ്തിരുന്നത് കാണുന്നത്. വലിയ അത്ഭുതമായിരുന്നു. വൈശാലിയുടെ സെറ്റിൽവെച്ചാണ് ആദ്യമായി സഞ്ജയെ കാണുന്നത്. ആദ്യദിവസം തന്നെ ഭരതൻ സർ ചെയ്യാൻ പറഞ്ഞത് ക്ലൈമാക്സിലെ ചുംബനരംഗമാണ്. എങ്ങനെ ചെയ്യുമെന്നുള്ള ആശങ്ക രണ്ടുപേർക്കുമുണ്ടായിരുന്നു. അഞ്ച് ടേക്ക് എടുത്തശേഷമാണ് ശരിയായത്. ഞങ്ങളുടെ രണ്ടുപേരുടെയും ജീവിതം മാറ്റിമറിച്ച സിനിമയാണ് വൈശാലി. വൈശാലിയിലൂടെയാണ് സഞ്ജയ് ജീവിതത്തിലേക്ക് വരുന്നത്. ഒരുമിച്ച് ജീവിച്ചിരുന്ന കാലമത്രയും ഞങ്ങൾ സന്തോഷത്തിലായിരുന്നു. ദൗർഭാഗ്യവശാൽ വിവാഹമോചിതരാകേണ്ടി വന്നു. പക്ഷെ ഇപ്പോഴും മനസിൽ പഴയ പ്രണയമുണ്ട്. ഒരുവട്ടം പ്രണയം തോന്നിയാൽ അത് ജീവിതകാലം മുഴുവൻ മനസിലുണ്ടാകും. അദ്ദേഹത്തിന് എന്റെ ജീവിതത്തിലുണ്ടാകേണ്ട കാലം എത്രനാളാണെന്ന് ദൈവം നേരത്തെ തീരുമാനിച്ചതാണ്. ആ സമയമെത്തിയപ്പോൾ ജീവിതത്തിൽ നിന്നും അദ്ദേഹം പോയി, അങ്ങനെയാണ് ഞാൻ കരുതുന്നത്. അതുകൊണ്ട് തന്നെ ഞങ്ങളുടെ ഇടയിൽ ശത്രുതയില്ല." തന്റെ മൂത്തമകനെ കണ്ടാൽ സഞ്ജയെ പോലെ തന്നെയാണെന്നും മകൻ മുന്നിൽ നിൽക്കുമ്പോൾ സഞ്ജയ് മുന്നിൽ നിൽക്കുന്നത് പോലെ തന്നെയാണ് തോന്നുന്നതെന്നും പറഞ്ഞ സുപർണ അകന്നാണ് കഴിയുന്നതെങ്കിലും ഇഷ്ടപ്പെട്ടയാൾ സന്തോഷമായി കഴിയുന്നത് കാണുന്നതാണ് സന്തോഷമെന്നും വ്യക്തമാക്കി. തന്റെ മക്കളുടെ നല്ല അമ്മയാണ് സുപർണയെന്ന് സഞ്ജയും പറഞ്ഞു. മക്കളെ നന്നായാണ് സുപർണ നോക്കി വളർത്തിയത്. അതിൽ ഒരുപാട് സന്തോഷമുണ്ടെന്നും സഞ്ജയ് അറിയിച്ചു. വർഷങ്ങൾക്ക് ശേഷമാണ് ഇരുവരും ഒരുവേദിയിൽ വീണ്ടും എത്തുന്നത്.