കൊവിഡ് ലോക്ക് ഡൗൺ വന്നതിന് ശേഷം വാപ്പച്ചി വീടിന് പുറത്തിറങ്ങിയിട്ടില്ലെന്ന് ദുൽഖർ സൽമാൻ. ഒരു ഓൺലൈൻ മാദ്ധ്യമത്തിന് നൽകിയ അഭിമുഖത്തിലാണ് മമ്മൂട്ടിയെക്കുറിച്ച് ദുൽഖർ പറഞ്ഞത്.

150 ദിവസമായി മമ്മൂട്ടി ഗേറ്റിന് പുറത്തേക്കിറങ്ങിയിട്ടില്ലെന്നാണ് ദുൽഖർ പറയുന്നത്. കൊവിഡ് ലോക്ക് ഡൗണും നിയന്ത്രണങ്ങളും വന്നതോടെ മമ്മൂട്ടിയും ദുൽഖർ സൽമാനും കുടുംബത്തോടൊപ്പം കൊച്ചിയിലെ വീട്ടിലാണ് താമസം.

'ഞാൻ 150 ദിവസം വീട്ടിൽ നിന്ന് ഇറങ്ങിയിട്ടില്ല. ഗേറ്റിനു പുറത്തു പോലും പോയിട്ടില്ല' എന്നാണ് വാപ്പച്ചി പറയുകയെന്നും ഇങ്ങനെ പേഴ്സണലി എന്തെങ്കിലുമൊരു ചലഞ്ച് ചെയ്യാൻ ഒത്തിരി ഇഷ്ടമാണെന്നും മമ്മൂട്ടിയെക്കുറിച്ച് ദുൽഖർ പറയുന്നു.നവെറുതെയൊരു ഡ്രൈവിനോ എന്തെങ്കിലുമൊന്നിനു പുറത്തു പോയ്ക്കൂടെ എന്ന് താൻ ചോദിച്ചിരുന്നെങ്കിലും അദ്ദേഹം വീട്ടിൽ നിന്ന് പുറത്തിറങ്ങില്ലെന്ന കടുത്ത നിലപാടിലാണ്. "ഇത്ര ദിവസം ആയില്ലേ… ഇനി എത്ര ദിവസം വരെ പുഷ് ചെയ്യാൻ പറ്റുമെന്ന് നോക്കട്ടെ' എന്നാണ് വാപ്പച്ചിയുടെ മറുപടിയെന്നും ദുൽഖർ കൂട്ടിച്ചേർത്തു. നമുക്കു ഓരോ ആളുകളെ കാണുമ്പോഴും അവരുടെ ഓരോ പ്രത്യേകതകൾ ഇഷ്ടപെടുമെന്നും വാപ്പച്ചിയുടെ സ്റ്റൈലും അഭിനയവും ഒക്കെ തനിക്ക് ഇഷ്ടമാണെന്നും ദുൽഖർ പറഞ്ഞു. ജോഫിൻ ചാക്കോ സംവിധാനം ചെയ്യുന്ന ദി പ്രീസ്റ്റ് എന്ന സിനിമയുടെ ഷെഡ്യൂൾ പൂർത്തിയാക്കുന്നതിനിടെയായിരുന്നു ലോക്ക് ഡൗൺ. സിബിഐ സീരീസ് അഞ്ചാം ഭാഗം, ബിലാൽ, സത്യൻ അന്തിക്കാട് ചിത്രം എന്നിവയാണ് മമ്മൂട്ടിയുടേതായി ചിത്രീകരണം പൂർത്തിയാകാനുള്ള സിനിമകൾ.