തിരുവനന്തപുരം: സംസ്ഥാനത്ത് മഴ ശമിക്കുന്നു. ഇന്നലെ സംസ്ഥാനത്ത് പൊതുവേ മഴ കുറവായിരുന്നു. 2 ദിവസത്തിനുള്ളിൽ വടക്ക് പടിഞ്ഞാറൻ ബംഗാൾ ഉൾക്കടലിൽ ഒഡിഷയിലെ ബലാഷോറിനു സമീപം പുതിയ ന്യൂനമർദ്ദം രൂപപ്പെടാൻ സാദ്ധ്യതയുണ്ടെങ്കിലും സംസ്ഥാനത്തെ ബാധിച്ചേക്കില്ല എന്നാണ് വിലയിരുത്തൽ.
കാസർകോട്,കണ്ണൂർ,കോഴിക്കോട്,വയനാട്,ഇടുക്കി ജില്ലകളുടെ കിഴക്കൻ മലയോരത്ത് ഇന്നും നാളെയും ഒറ്റപ്പെട്ട മഴയ്ക്ക് സാദ്ധ്യതയുണ്ട്. വരും ദിവസങ്ങളിൽ സംസ്ഥാനത്ത് മൺസൂൺ നിർജീവമാകുന്ന അവസ്ഥയാണ് നിലനിൽക്കുന്നത്. മലപ്പുറം,പാലക്കാട്,എറണാകുളം ജില്ലകളിലെല്ലാം ചൂട് 33 ഡിഗ്രിയിലേക്ക് ഉയരാനും സാദ്ധ്യതയുണ്ട്.