തിരുവനന്തപുരം: മഴക്കാലത്ത് എലിപ്പനി വ്യാപിക്കാൻ സാദ്ധ്യതയുള്ളതിനാൽ ജാഗ്രതവേണമെന്ന് മന്ത്രി കെ.കെ. ശൈലജ പറഞ്ഞു. തുടക്കത്തിൽ കണ്ടെത്തി ചികിത്സിച്ചില്ലെങ്കിൽ മരണത്തിനും സാദ്ധ്യതയുണ്ട്. സർക്കാർ ആശുപത്രികളിൽ എലിപ്പനിക്കെതിരായ സൗജന്യ ചികിത്സ ലഭ്യമാണ്. കെട്ടിനിൽക്കുന്ന വെള്ളത്തിൽ ഇറങ്ങുന്നവർക്കും മലിനജലവുമായി സമ്പർക്കത്തിൽ വരുന്നവർക്കുമാണ് എലിപ്പനിയുണ്ടാകുന്നതിന് സാദ്ധ്യത കൂടുതൽ.

 ലക്ഷണങ്ങൾ
പനി, പേശി വേദന, തലവേദന, വയറു വേദന, ഛർദ്ദി, കണ്ണ് ചുവപ്പ്. രോഗം മൂർച്ഛിച്ചാൽ കരൾ, വൃക്ക, തലച്ചോർ, ശ്വാസകോശം തുടങ്ങിയ ആന്തരാവയവങ്ങളെ ബാധിക്കും.

വേണ്ടത് മുൻകരുതൽ
 മലിന ജലത്തിൽ സമ്പർക്കമുണ്ടായാൽ സോപ്പുപയോഗിച്ച് ശരീരം വൃത്തിയാക്കണം.

 ആഹാര സാധനം അടച്ചു സൂക്ഷിക്കുക

 തിളപ്പിച്ചാറ്റിയ ശുദ്ധജലം മാത്രം കുടിക്കുക

 വെള്ളത്തിലിറങ്ങേണ്ട സാഹചര്യമുണ്ടായാൽ കട്ടിയുള്ള കൈ-കാലുറകൾ ധരിക്കണം.

 പാടത്തും പറമ്പിലും ജോലിചെയ്യുന്നവർ, ശുചീകരണത്തൊഴിലാളികൾ എന്നിവർ ജാഗ്രതപാലിക്കണം.

 ഡോക്ടറുടെ നിർദ്ദേശപ്രകാരം പ്രതിരോധ മരുന്നായ ഡോക്‌സിസൈക്ലിൻ 200 മില്ലിഗ്രാമിന്റെ ഒരു ഗുളിക അല്ലെങ്കിൽ 100 മില്ലിഗ്രാമിന്റെ രണ്ട് ഗുളിക ആഴ്ചയിലൊരിക്കൽ കഴിക്കണം.