പാലോട്: വ്യാപാര സ്ഥാപനങ്ങളിൽ ജോലി ചെയ്യുന്നവർ, ആട്ടോ ഡ്രൈവേഴ്‌സ് , ജനങ്ങളുമായി അടുത്തിടപഴകുന്നവർ എന്നിങ്ങനെ 70 പേരിൽ ഇന്നലെ പാലോട്ട് ആന്റിജൻ ടെസ്റ്റ് നടത്തി . 11 പേർക്ക് രോഗം സ്ഥിരീകരിക്കുകയും ഇവരെ ജില്ലാമെഡിക്കൽ ഓഫീസറുടെ നിർദ്ദേശപ്രകാരം ഐസോലേഷൻ വാർഡുകളിലേക്ക് മാറ്റുകയും ചെയ്തു. ഇതിൽ 2 പേർ നേരത്തെ രോഗം സ്ഥിരീകരിച്ച വ്യക്തിയുടെ മാതാപിതാക്കളും. ബാക്കി 9 പേർ പ്ലാവറയിലുള്ള സൂപ്പർമാർക്കറ്റിലെ കയറ്റിറക്ക് തൊഴിലാളികളും അവിടത്തെ ജീവനക്കാരുമാണ്. രോഗബാധിതർ സന്ദർശിച്ച പാലോട്ടെ റെയ്ഞ്ചാഫീസിനു സമീപമുള്ള സ്വകാര്യ ചികിൽസാ കേന്ദ്രവും അടച്ചു.ഇവരുമായി അടുത്ത് ഇടപഴകിയിട്ടുള്ളവർ അടിയന്തരമായി സ്വയം നിരീക്ഷണത്തിൽ പ്രവേശിക്കണമെന്ന് ആരോഗ്യ വകുപ്പും പഞ്ചായത്തും അറിയിച്ചു.കഴിഞ്ഞ ദിവസങ്ങളിൽ സ്ഥാപനത്തിൽ സന്ദർശനം നടത്തിയിട്ടുള്ളവരും സ്വയം നിരീക്ഷണത്തിൽ പോകേണ്ടതാണ്. രോഗ ലക്ഷണം ഉള്ളവർക്ക് പിന്നീട് ആന്റിജൻ ടെസ്റ്റ് ഉൾപ്പെടെയുള്ള പരിശോധനകൾ നടത്തുമെന്നും പഞ്ചായത്ത് അറിയിച്ചു.