മുടപുരം: ചിറയിൻകീഴ് ബ്ലോക്ക് പഞ്ചായത്തിന്റെ നേതൃത്വത്തിൽ നടന്നു വരുന്ന കൊവിഡ് പരിശോധനയിൽ അഞ്ചുതെങ്ങിലെ 9 പേർക്ക് കൂടി രോഗം കണ്ടെത്തുകയും 20 പേർ കൂടി രോഗമുക്തി നേടിയിട്ടുണ്ടെന്നും ബ്ലോക്ക് പഞ്ചായത്ത് പ്രസിഡന്റ് ആർ. സുഭാഷും ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ അഞ്ചുതെങ്ങ് സുരേന്ദ്രനും അറിയിച്ചു.

അഞ്ചുതെങ്ങ് മാമ്പള്ളിയിൽ 41 പേരെ പരിശോധിച്ചതിലാണ് 9 പേർക്ക് കൂടി രോഗം സ്ഥിരീകരിച്ചത്.

ചിറയിൻകീഴ് താലൂക്കാശുപത്രിയിൽ 19 പേരിൽ നടത്തിയ ആന്റിജൻ പരിശോധനയിൽ പോത്തൻകോട് സ്വദേശിക്ക് രോഗമുള്ളതായി കണ്ടെത്തി. ആർ.ടി.പി.സി.ആർ നടത്തിയ 9 പേരുടെ ഫലം അടുത്ത ദിവസങ്ങളിൽ ലഭിക്കും.

നെടുംങ്ങണ്ട കൊവിഡ് ചികിത്സാ കേന്ദ്രത്തിൽ നിന്ന് 20 പേർ കൂടി രോഗമുക്തരായി. കൊവിഡ് 19 താലൂക്ക് തല നോഡൽ ഓഫീസർ ഡോ. രാമകൃഷ്ണ ബാബുവിന്റെ നേതൃത്വത്തിൽ ഡോ. നബീൽ, ഡോ. രശ്മി, ഡോ. അഞ്ചു എന്നിവർ ഉൾപ്പെട്ട സംഘമാണ് പരിശോധന നടത്തിയത്. പരിശോധന അടുത്ത ദിവസങ്ങളിലുമുണ്ടാകും.