ശബരിമല :ചിങ്ങപ്പുലരിയിൽ പുലർച്ചെ 5ന് ശബരിമല ശ്രീ ധർമ്മശാസ്താക്ഷേത്ര നട തുറന്നു. ക്ഷേത്രതന്ത്രി കണ്ഠരര് രാജീവരരുടെ മുഖ്യ കാർമ്മികത്വത്തിൽ മേൽശാന്തി എ.കെ.സുധീർ നമ്പൂതിരി ശ്രീകോവിൽ നട തുറന്ന് ദീപം തെളിച്ചു. തുടർന്ന് ഉപദേവതാ ക്ഷേത്രങ്ങളിലെ നടകളും തുറന്ന് വിളക്ക് തെളിച്ചു. നിർമ്മാല്യ ദർശനത്തിനു ശേഷം തന്ത്രി ധർമ്മശാസ്താ വിഗ്രഹത്തിൽ ഭസ്മാഭിഷേകം നടത്തി. ജലം, പാൽ, തേൻ, പഞ്ചാമൃതം, ഇളനീർ എന്നിവ കൊണ്ടുള്ള അഭിഷേകവും നടന്നു. നിവേദ്യ പൂജയ്ക്ക് ശേഷം അയ്യപ്പവിഗ്രഹത്തിൽ നെയ്യഭിഷേകവും നടത്തി. മണ്ഡപത്തിൽ മഹാഗണപതി ഹോമം, ഉഷപൂജ, കലശാഭിഷേകം, ഉച്ചപൂജ എന്നിവയ്ക്ക് ശേഷം 10ന് നട അടച്ചു. വൈകിട്ട് 5 ന് നടതുറന്നുള്ള പൂജകൾക്ക് ശേഷം രാത്രി 7.30ന് ഹരിവരാസനം പാടി നട അടച്ചു. ഓണക്കാലത്ത് 29 മുതൽ സെപ്തബർ 2 വരെ പൂജകൾക്കായി നട തുറക്കും. പതിവുപോലെ ഓണസദ്യയുമുണ്ടാകും.