വണ്ണം കുറയ്ക്കാൻ എളുപ്പമാർഗ്ഗം തേടുന്നവരുടെ എണ്ണം ദിവസേന കൂടിവരികയാണ്. ആഹാരനിയന്ത്രണം, വ്യായാമം, നല്ല ശീലങ്ങൾ എന്നിവയൊന്നും പറ്റില്ല. പകരം ഗുളിക വല്ലതും തന്നാൽ കഴിക്കാം എന്നാണ് പലരും പറയുന്നത്.

വണ്ണം കുറയ്ക്കണമെന്ന് തീവ്രമായി ആഗ്രഹിക്കുന്നവർ പോലും കുറച്ചുദിവസം അതിനായി പരിശ്രമിക്കുന്നതല്ലാതെ അത് തുടർച്ചയായി ശ്രദ്ധിക്കുന്നില്ലെന്ന് കാണാം.

ചിലതരം തൈറോയ്ഡ് രോഗങ്ങൾ, ചില മരുന്നുകൾ, ജനിതക വൈകല്യങ്ങൾ, അമിതഭക്ഷണം, പാരമ്പര്യം, ജീവിതശൈലി വ്യതിയാനങ്ങൾ, അദ്ധ്വാനം വളരെ കുറവുള്ള ജീവിത രീതിയും ജോലിയും എന്നിവയെല്ലാം വണ്ണം കൂടാൻ കാരണമാകുന്നു. ശരീരത്തിൽ കാര്യമായ മാറ്റങ്ങൾ ഉണ്ടാക്കുന്നു.
എന്നാൽ. പൊണ്ണത്തടിയുള്ള പലരും അത് കാരണമുണ്ടാകുന്ന ആരോഗ്യ പ്രശ്നങ്ങളെക്കുറിച്ച് ബോധവാന്മാരല്ല.അവർ ഇപ്പോഴും ഡോക്ടറെ സമീപിക്കുന്നത് കുടവണ്ടി കുറയ്ക്കാൻ വല്ല മരുന്നോ ഒറ്റമൂലി പ്രയോഗമോ ഉണ്ടോ എന്ന് അന്വേഷിക്കാനാണ്.

വണ്ണക്കൂടുതൽ എന്നതിന്റെ അടുത്ത ഘട്ടമാണ് പൊണ്ണത്തടി.

നിരവധി രോഗങ്ങൾക്ക് കാരണമാകുമെന്നതിനാലും, ജീവിതം ഗണ്യമായി തകിടം മറിയാൻ സാധ്യതയുള്ളതിനാലും, പല രോഗങ്ങൾക്കൊപ്പം

പൊണ്ണത്തടി കൂടിയുണ്ടെങ്കിൽ ചികിത്സ ദുഷ്കരമാകും. അതിനാൽ ചെറിയ പ്രായം മുതൽ വണ്ണം അമിതമായി വർദ്ധിക്കാതിരിക്കാൻ പ്രയത്നിച്ചു കൊണ്ടിരിക്കണം. വണ്ണമുണ്ടെങ്കിൽ കുട്ടികൾക്ക് ആരോഗ്യമുണ്ട് എന്ന രക്ഷിതാക്കളുടെ വിചാരം മാറ്റണം.

ഉപവാസം, പ്രസവം എന്നിവയ്ക്കുശേഷം ശരീരത്തെ പോഷിപ്പിക്കുന്ന ആഹാരം ശീലിക്കുകയും അദ്ധ്വാനം കുറയ്ക്കുകയും ചെയ്താൽ കഴിക്കുന്ന ഭക്ഷണം ശരീരത്തിൽ കാണും എന്ന് തന്നെ പറയേണ്ടി വരും. അസിഡിറ്റി ഉണ്ടാക്കുന്ന ഭക്ഷണം ഉപയോഗിക്കുന്നത് കാരണമുണ്ടാകുന്ന നെഞ്ചിരിച്ചിൽ വിശപ്പാണെന്ന് തെറ്റിദ്ധരിച്ച് ഇടയ്ക്കിടയ്ക്ക് ധാരാളമായി ഭക്ഷണം കഴിക്കുന്നവർക്ക് വണ്ണം വ‌ർദ്ധിക്കുകതന്നെ ചെയ്യും.

വണ്ണം കുറയണമെന്ന് ആഗ്രഹമുള്ളവർ ധാന്യങ്ങൾ, കിഴങ്ങുവർഗങ്ങൾ, മാംസം,തണുപ്പിച്ച ഭക്ഷണം,മധുരം, പകലുറക്കം എന്നിവ പരമാവധി ഒഴിവാക്കണം.

പായസം, ഉഴുന്ന്, ഏത്തപ്പഴം, പാലുൽപ്പന്നങ്ങൾ, മുട്ട, എണ്ണയിൽ വറുത്തവ എന്നിവയും വളരെ മിതമായി മാത്രമേ ഉപയോഗിക്കാവൂ.

വ്യായാമത്തിന്റെ കുറവ്, നിയന്ത്രണമില്ലാത്ത ഭക്ഷണം, തെറ്റായ ജീവിതചര്യ, അമിത വണ്ണത്തിന് കാരണമാകുന്ന മരുന്നുകളുടെ ഉപയോഗം എന്നിവയ്ക്ക് ദീർഘനാൾ ശ്രദ്ധയോടെ പരിഹാരം തേടുന്നവർക്ക് ആകർഷകമായ ആകാരത്തോടെ ആരോഗ്യവാനായി ജീവിക്കാം.