നെയ്യാറ്റിൻകര:കൊവിഡും ലോക്ക് ഡൗണുമൊക്കെയായി ജീവിതം ദുരിതത്തിലായതോടെ പലരും കഴിക്കാനുള്ള ആഹാരം സ്വന്തമായി തന്നെ ഉത്പാദിപ്പിക്കാനുള്ള ശ്രമത്തിലാണ്. ഇതിലേക്കായി പലരും കൃഷിയിലേക്ക് തിരിഞ്ഞു. എന്നാൽ കൃഷിയും ചെലവേറിയതായതിനാൽ നെയ്യാ​റ്റിൻകര താലൂക്ക് പ്രവാസി വെൽഫെയർ സൊസൈ​റ്റിയുടെ മേൽനോട്ടത്തിൽ ഗ്രൂപ്പ് അടിസ്ഥാനത്തിൽ വെർട്ടിക്കൽ കൃഷി ചെയ്യാനൊരുങ്ങുകയാണ്. സ്ഥലം തീരെ കുറവുള്ള വീട്ടുകാർക്കും ഒന്നോ രണ്ടോ സെന്റിൽ വീട്ടാവശ്യത്തിനുള്ള പച്ചക്കറിയൊക്കെ വെർട്ടിക്കൽ ഫാമിംഗിലൂടെ ഉത്പാദിപ്പിക്കാനാകും.
വെർട്ടിക്കൽ ഫാമിംഗിലൂടെ കുറഞ്ഞ സ്ഥലത്ത് നിന്ന് കൂടുതൽ വിളവെടുക്കാൻ കഴിയുമെന്ന് മാത്രമല്ല ഇത് ഹൈടെക് കൃഷി രീതിയായതിനാൽ യുവതലമുറയ്ക്കും താത്പര്യമേറും.

വെർട്ടിക്കൽ ഫാമിംഗ്
ഈ രീതി ഉപയോഗിച്ചാൽ പച്ചക്കറിവിളകൾക്ക് ആവശ്യാനുസരണം കാ​റ്റും വെളിച്ചവുമെല്ലാം ലഭിക്കും. കുത്തനെ അടുക്കുകളായി വിളകൾ വളർത്താവുന്ന സംവിധാനമാണ് വെർട്ടിക്കൽ ഫാമിംഗ്. സ്ഥലത്തിന്റെ ഘടന, പ്രകാശം, വളർത്താനുള്ള മാദ്ധ്യമം എന്നിവയെല്ലാം പരിഗണിച്ചാണ് കൃഷി.
കുത്തനെ നിൽക്കുന്ന ടവർ പോലെയുള്ള വസ്തുക്കളിലും പ്രത്യേകിച്ച് രണ്ടായി കീറി മുറിച്ച പി.വി.സി പൈപ്പുകളിലും പച്ചക്കറികൾ വളർത്തുന്ന രീതിയാണിത്. അതുകൊണ്ടുതന്നെ സ്ഥലം കൂടുതൽ ആവശ്യമില്ല.

കൃഷിക്ക് മണ്ണ് വേണ്ട
മണ്ണിന് പകരം ഹൈഡ്റോപോണിക്‌സ്, അക്വാപോണിക്‌സ് എന്നീ രീതികളാണ് വെർട്ടിക്കൽ ഫാമിംഗിന് സാധാരണ ഉപയോഗിക്കുന്നത്. മ​റ്റുള്ള കൃഷിരീതികളെ അപേക്ഷിച്ച് 95 ശതമാനത്തോളം വെള്ളത്തിന്റെ ആവശ്യം കുറയ്ക്കാൻ കഴിയും. മഴ കുറവുള്ള പ്രദേശങ്ങളിലും വളരെ എളുപ്പത്തിൽ ലഭ്യമായ വെള്ളം ഉപയോഗിച്ച് കൃഷി ചെയ്യാമെന്നതും പ്രത്യേകതയാണ്.

കൃഷി രീതി പലതുണ്ട്

വല ഉപയോഗിച്ച് പന്തൽപോലെ തട്ടുണ്ടാക്കി അതിലും പച്ചക്കറികൾ വളർത്താം. പാവലും പയറും പടവലവും വെള്ളരിയും കോവയ്ക്കയും ഈ രീതിയിൽ വളർത്തിയെടുക്കാം. മീൻപിടിക്കാൻ ഉപയോഗിക്കുന്ന പഴയ വലകളും മതി. 10 മീ​റ്റർ നീളവും രണ്ട് മീ​റ്റർ വീതിയുമുള്ള വലകൾ വാങ്ങിയും ഉപയോഗിക്കാം. നീളത്തിലും വെർട്ടിക്കലായും രണ്ടായി കീറി ഘടിപ്പിച്ച പി.വി.സി പൈപ്പിൽ ചകിരിച്ചോറോ മറ്റോ ഉപയോഗിച്ച് അതിൽ ചെടിനടാം. വള്ളികൾ വളർന്നു വരുമ്പോൾ ഈ വലയിലേക്ക് കയ​റ്റിവിട്ടാൽ മതി. നിലത്ത് പടരുന്ന പച്ചക്കറികൾക്ക് ഉയരത്തിലേക്ക് വളരാനുള്ള ഇടം നൽകുന്നതാണ് നല്ലത്. കൂടുതൽ ആരോഗ്യമുള്ള ചെടികൾ ലഭിക്കും. തുറസായ സ്ഥലത്ത് കൃഷി ചെയ്യുന്നവർക്ക് ഈ രീതിയിൽ വെർട്ടിക്കൽ ഫാമിംഗ് ചെയ്യാവുന്നതാണ്.

പോളിഹൗസ്

പോളിഹൗസിലും വെർട്ടിക്കൽ ഫാമിംഗ് ചെയ്യാം. 1000 സ്‌ക്വയർ മീ​റ്റർ വിസ്തീർണമുള്ള പോളിഹൗസിൽ നിന്ന്, തുറസായ സ്ഥലത്ത് 8000 സ്‌ക്വയർ മീ​റ്റർ കൃഷിഭൂമിയിൽ വളർത്തുമ്പോൾ കിട്ടുന്ന അതേ വിളവ് ലഭിക്കുന്നുവെന്നതാണ് ഈ കൃഷിരീതിയുടെ ഗുണമേന്മ. നിഴലിന്റെ പ്രശ്‌നവും പോളിഹൗസിൽ ഉണ്ടാകുന്നില്ല. കുത്തനെയുള്ള പച്ചക്കറികളുടെ വേലിയിൽ എല്ലാ ഭാഗത്തും ഓരോ രീതിയിൽ സൂര്യപ്രകാശം ലഭിക്കുന്നു. വിളവെടുക്കാവുന്ന പച്ചക്കറികൾ ഓരോ വലിപ്പത്തിലും നീളത്തിലുമുള്ളവയായിരിക്കും.