തിരുവനന്തപുരം: പഠനവകുപ്പുകളിലെ അദ്ധ്യാപക നിയമനങ്ങൾ യു.ജി.സി മാനദണ്ഡങ്ങൾ പാലിച്ച് പൂർണ്ണമായും മെരി​റ്റടിസ്ഥാനത്തിലാണ് നടത്തിയതെന്ന് കേരള സർവകലാശാലയുടെ വിശദീകരണം. ഓരോ അപേക്ഷയും സൂക്ഷ്മപരിശോധനയ്ക്ക് ശേഷം അപേക്ഷകന് ലഭ്യമായ ഇൻഡക്സ് മാർക്ക്‌ ബോധ്യപ്പെടുത്തിയും ഇന്റർവ്യൂ നടത്തിയുമാണ് മികച്ചയാളെ സെലക്ഷൻ കമ്മി​റ്റി ശുപാർശ ചെയ്യുന്നത്. ചാൻസലറുടെ പ്രതിനിധി ഉൾപ്പെടെ വിവിധ സർവകലാശാലകളിലെ പ്രൊഫസർമാരടങ്ങുന്നതാണ് ഈ സമിതി. ഗവേഷണ താൽപര്യവും അദ്ധ്യാപനമികവും അക്കാഡമിക് യോഗ്യതകളുമെല്ലാം പരിശോധിച്ചാണ് ശുപാർശ. അപേക്ഷകന്റെ കുടുംബ പശ്ചാത്തലവും മ​റ്റും പരിഗണിക്കില്ല. കമ്മി​റ്റിയുടെ ശുപാർശ അംഗീകരിക്കുകയോ, വീണ്ടും വിജ്ഞാപനത്തിനു നിർദേശിക്കുകയോ ചെയ്യുന്ന ഭരണപരമായ ഉത്തരവാദിത്തമാണ് സിൻഡിക്കേറ്റിനുള്ളത്. മികച്ച നിർദേശങ്ങളായതു കൊണ്ടാണ് നിയമനങ്ങൾക്ക് സിൻഡിക്കേ​റ്റ് അനുമതി നൽകിയത്.

2017ലാണ് അദ്ധ്യാപക നിയമനത്തിന് വിജ്ഞാപനമിറക്കിയത്. ഒഴിവുകൾ ഒ​റ്റ യൂണി​റ്റായി പരിഗണിച്ചാണ് സംവരണമേർപ്പെടുത്തിയത്. സുപ്രീം കോടതിയിലുൾപ്പെടെ നടന്ന കേസുകൾക്കൊടുവിലാണ് 49 അദ്ധ്യാപക നിയമനങ്ങൾ നടത്തിയതെന്നും സർവകലാശാല അറിയിച്ചു.