തിരുവനന്തപുരം: പട്ടികവർഗ കുടുംബങ്ങൾക്ക് ഓണക്കിറ്റും 60 വയസ് കഴിഞ്ഞ പട്ടികവർഗക്കാർക്ക് ഓണക്കോടിയും നൽകുന്നതിന്റെ സംസ്ഥാനതല ഉദ്ഘാടനം മുഖ്യമന്ത്രി പിണറായി വിജയൻ ഇന്ന് വൈകിട്ട് നാലു മണിക്ക് ഓൺലൈനായി നിർവഹിക്കും.

സംസ്ഥാനത്തെ 162382 പട്ടികവർഗ കുടുംബങ്ങൾക്കാണ് ഓണക്കിറ്റുകൾ വിതരണം ചെയ്യുന്നത്. അരി(15 കിലോ), ചെറുപയർ(500 ഗ്രാം), പഞ്ചസാര(500 ഗ്രാം), മുളകുപൊടി(200 ഗ്രാം), ശർക്കര(500 ഗ്രാം), വെളിച്ചെണ്ണ(500 ഗ്രാം), ഉപ്പുപൊടി(ഒരു കിലോ), തുവര പരിപ്പ്(250 ഗ്രാം), തേയില(200 ഗ്രാം) എന്നിങ്ങനെ ഒമ്പതിനം ഭക്ഷ്യവസ്തുക്കളുണ്ടാകും. 14,04,36,088 രൂപയാണ് ഇതിനായി പട്ടികവർഗ വികസന വകുപ്പിന്റെ ഭക്ഷ്യസഹായ പദ്ധതിയിൽ നിന്ന് ചെലവഴിക്കുന്നത്.

മുൻ വർഷത്തേക്കാൾ 2629 പേർക്ക് ഇക്കൊല്ലം അധികമായി ഓണക്കിറ്റ് നൽകുന്നുണ്ട്. സംസ്ഥാന സിവിൽ സപ്ലൈസ് കോർപറേഷൻ മഖേനയാണ് ഇവ വിതരണം ചെയ്യുന്നത്.