മാഹി: കണ്ണൂർ എയർപോർട്ടിൽ ജോലി വാഗ്ദാനം ചെയ്ത് നിരവധി പേരെ കബളിപ്പിച്ച് പണം തട്ടിയ കേസിലെ മുഖ്യപ്രതി തലശേരി കോടതിക്ക് സമീപം മമോട്ടി വീട്ടിൽ കെ.എം. വിപിനെ (44) ചോമ്പാല പോലീസ് അറസ്റ്റുചെയ്തു. ജോലി വാഗ്ദാനം ചെയ്ത് കോഴിക്കോട്, കണ്ണൂർ ജില്ലകളിലായി നിരവധി പേരിൽ നിന്ന് ലക്ഷങ്ങൾ തട്ടിയെടുത്ത കേസിലാണ് അറസ്റ്റ്.
മടപ്പള്ളി സ്വദേശിയിൽ നിന്നും അഞ്ചു ലക്ഷം വാങ്ങി വിമാനത്താവളത്തിൽ ചായക്കട ശരിപ്പെടുത്തിതരാം എന്ന് വാഗ്ദാനം നൽകി വഞ്ചിക്കുകയായിരുന്നു. കേസിലെ മറ്റൊരു പ്രതി അരുൺകുമാർ റിമാൻഡിലാണ്.
എയർ പോർട്ട് ജോലി തട്ടിപ്പുമായി ബന്ധപ്പെട്ട് രണ്ട് കേസുകൾ ചോമ്പാല സ്റ്റേഷനിൽ രജിസ്റ്റർ ചെയ്തിട്ടുണ്ട്. തലശേരി സ്റ്റേഷനിലും ഇതേ പ്രതികൾക്കെതിരെ കേസുകൾ നിലവിലുണ്ട്. എയർപോർട്ടിൽ ഉയർന്ന ശമ്പളത്തിൽ ജോലി വാഗ്ദാനം ചെയ്ത് ഉദ്യോഗാർത്ഥികളെ വിശ്വസിപ്പിച്ചാണ് പ്രതികൾ ലക്ഷങ്ങൾ വാങ്ങി തട്ടിപ്പ് നടത്തിയത്. ഇപ്പോഴും ഒളിവിൽ കഴിഞ്ഞ് വിവിധ സ്ഥലങ്ങളിലുള്ള ഉദ്യോഗാർത്ഥികളെ തട്ടിപ്പിനിരയാക്കി കൊണ്ടിരിക്കെയാണ് കാക്കൂർ പൊലീസിന്റെ സഹായത്തോടെ ചേളന്നൂരിൽ നിന്ന് പ്രതിയെ കസ്റ്റഡിയിൽ എടുത്തത്.
നിരവധി പേരെ ഈ സംഘം കബളിപ്പിച്ചിട്ടുണ്ടെന്നാണ് പൊലീസിനു ലഭിച്ച വിവരം. പല സർക്കാർ സ്ഥാപനങ്ങളിലും ജോലി വാഗ്ദാനം ചെയ്ത് ഇവർ ലക്ഷങ്ങൾ തട്ടിയതായ് ചോമ്പാൽ പൊലീസ് പറഞ്ഞു.
ചോമ്പാല ഇൻസ്‌പെക്ടർ ടി.പി സുമേഷ്, എസ്.ഐ നിഖിൽ, അഡീഷണൽ എസ്.ഐ അശോകൻ, എ.എസ്.ഐമാരായ മനോജൻ, മനോജ് കുമാർ, സീനിയർ സിവിൽ പൊലീസ് ഓഫിസർ ഷാജി, ഷീന, ജയപാലൻ എന്നിവരുടെ നേതൃത്വത്തിലുള്ള സംഘമാണ് പ്രതിയെ അറസ്റ്റുചെയ്തത്. പ്രതിയെ വടകര ഫസ്റ്റ് ക്ലാസ് ജുഡീഷ്യൽ മജിസ്ട്രേറ്റ് കോടതി റിമാൻഡ് ചെയ്തു. വിപിന്റെ അറസ്റ്റോടെ കൂടുതൽ കേസുകൾ പുറത്തുവരുമെന്ന് പൊലീസ് കരുതുന്നു.