കല്ലമ്പലം: ജപ്തി ഭീഷണിയെ തുടർന്ന് ആത്മഹത്യ ചെയ്ത പ്രവാസിയുടെ കുടുംബത്തിന് കിളിമാനൂർ കെ.എം ജയദേവൻ മാസ്റ്റർ സ്മാരക പെയിൻ ആൻഡ് പാലിയേറ്റീവ് കെയർ സൊസൈറ്റി നിർമ്മിച്ചു നൽകിയ വീടിന്റെ താക്കോൽ കൈമാറി. പള്ളിക്കൽ മൂതല ചെമ്മരം സ്വദേശിയായ അനിൽകുമാറിന്റെ കുടുംബത്തിനാണ്‌ സാഫല്യം എന്ന പേരിൽ സൊസൈറ്റി വീട് നിർമ്മിച്ചു നൽകിയത്. താക്കോൽ കൈമാറൽ വീഡിയോ കോൺഫറൻസിലൂടെ മന്ത്രി കടകംപള്ളി സുരേന്ദ്രൻ ഉദ്ഘാടനം ചെയ്തു. ജില്ലാ പഞ്ചായത്ത് സ്ഥിരം സമിതി അദ്ധ്യക്ഷൻ ബി.പി മുരളി താക്കോൽ കുടുംബങ്ങൾക്ക് കൈമാറി. സൊസൈറ്റി പ്രസിഡന്റ് അഡ്വ. മടവൂർ അനിൽ അദ്ധ്യക്ഷത വഹിച്ചു. സെക്രട്ടറി എം. ഷാജഹാൻ സ്വാഗതവും സി.പി.എം പള്ളിക്കൽ ലോക്കൽ സെക്രട്ടറി സജീബ് ഹാഷിം നന്ദിയും പറഞ്ഞു.

കൊവിഡ് നിരീക്ഷണകേന്ദ്രത്തിൽ 63 ദിവസം പ്രവർത്തിച്ച ഡി.വൈ.എഫ്.ഐ കിളിമാനൂർ ട്രഷററും സി.പി.എം നഗരൂർ ലോക്കൽ കമ്മിറ്റിയംഗവുമായ ഡി. രജിത്തിനെ വി.ജോയി എം.എൽ.എ ആദരിച്ചു. പ്രതിഫലമായി ലഭിച്ച 43000 രൂപ രജിത്ത് മുഖ്യമന്ത്രിയുടെ ദുരിതാശ്വാസ നിധിയിലേക്ക് കൈമാറി. സി.പി.എം കിളിമാനൂർ ഏരിയാ സെക്രട്ടറി അഡ്വ.എസ്. ജയചന്ദ്രൻ, സൊസൈറ്റി ജോയിന്റ് സെക്രട്ടറി ഡി. സ്മിത, ട്രഷറർ രഘുനാഥൻ, ബ്ലോക്ക്‌ പഞ്ചായത്ത് പ്രസിഡന്റ് ശ്രീജാ ഷൈജുദേവ്, പള്ളിക്കൽ പഞ്ചായത്ത് പ്രസിഡന്റ് അടുക്കൂർ ഉണ്ണി എന്നിവർ പങ്കെടുത്തു.