മാനന്തവാടി:വയനാട് ജില്ലാ ലൈബ്രറി കൗൺസിലിന്റെ ആഭിമുഖ്യത്തിൽ ജില്ലയിലെ ഡയാലിസിസിന് വിധേയരാകുന്ന നിർധനരായ രോഗികളെ സഹായിക്കുന്നതിനായുളള ഓർമ്മദിനത്തിൽ ഒരു സാന്ത്വനം എന്ന പദ്ധതിക്ക് ഇന്ന് തുടക്കമിടുമെന്ന് ഭാരവാഹികൾ വാർത്താ സമ്മേളനത്തിൽ അറിയിച്ചു.ജന്മദിനം,ചരമദിനം,വിവാഹ വാർഷികം തുടങ്ങി സന്തോഷം നൽകുന്നതും നൊമ്പരപ്പെടുത്തുന്നതുമായ ഓർമ്മദിനങ്ങൾ നമ്മുടെ കുടുംബത്തിൽമാത്രം ആചരിക്കുകയും ആഘോഷിക്കുകയും ചെയ്യുന്ന പതിവ് രീതികളെ മാറ്റി വേദന അനുഭവിക്കുന്ന ആയിരക്കണക്കിന് ഡയാലിസിസ് രോഗികൾക്ക് സഹായമെത്തിക്കുന്ന തരത്തിലാണ് പദ്ധതി രൂപം നൽകിയിട്ടുളളത്. പദ്ധതിയിലൂടെ ഒരുദിവസം ജില്ലയിലെ ഒരു രോഗിക്ക് ഡയാലിസിസ് ചെയ്യുന്നതിനാവശ്യമായ തുക കണ്ടെത്തുകയാണ് ലക്ഷ്യമിടുന്നത്.

ഇതിനായി ജില്ലയിലെ 200 ഗ്രന്ഥശാലകളിലെ പ്രവർത്തകർ ഗ്രന്ഥശാല പ്രവർത്തിക്കുന്ന പ്രദേശത്തെ ചുരുങ്ങിയത് 10 വീടുകളിൽനിന്നും ഓർമ്മദിനം സാമൂഹ്യ നന്മയ്ക്ക് ആചരിക്കുന്നവരെ കണ്ടെത്തി തുക പഞ്ചായത്ത്തല ലൈബ്രറി നേതൃസമിതികൾ മുഖേന ജില്ലാ ലൈബ്രറി കൗൺസിൽ സമാഹരിക്കും. ജില്ലാ ലൈബ്രറി കൗൺസിൽ ജില്ലാ ആരോഗ്യ വിഭാഗവുമായി ബന്ധപ്പെട്ട് അർഹരായ ഡയാലിസിസ് രോഗികളെ കണ്ടെത്തി ഡയാലിസിസ് കേന്ദ്രങ്ങൾക്ക് തുക കൈമാറും. പദ്ധതിയിലൂടെ സമാഹരിക്കുന്ന തുകയുടെ വരവ് ചെലവ് കണക്കുകൾ ഔദ്യോഗിക ഓഡിറ്റിന് വിധേയമാക്കുമെന്ന് ജില്ലാ ലൈബ്രറി കൗൺസിൽ ഭാരവാഹികൾ അറിയിച്ചു.ഇന്ന് (വ്യാഴാഴ്ച)പദ്ധതിയുടെ തുക സമാഹരണം ഔപചാരികമായി ആരംഭിക്കുകയും 2020 സെപ്തംബർ 14 ഗ്രന്ഥശാലാ ദിനത്തിൽ ഒരു ഡയാലിസിസ് രോഗിയുടെ ചെലവ് തുക കൈമാറുമെന്നും വാർത്താ സമ്മേളനത്തിൽ ജില്ലാ ലൈബ്രറി കൗൺസിൽ സെക്രട്ടറി പി.കെ.സുധീർ, എ.വി.മാത്യു, പി.ആർ.സതീഷ് എന്നിവർ അറിയിച്ചു.