ചേർത്തല: ചേന്നവേലി കടൽത്തീരത്ത് നങ്കൂരമിട്ടിരുന്ന വള്ളം കാ​റ്റിലും തിരയിലും പെട്ട് തകർന്നു. അർത്തുങ്കൽ, കാട്ടൂർ എന്നിവിടങ്ങളിൽ നിന്ന് സുരക്ഷിത താവളം തേടി കൊച്ചി ഹാർബറിലേക്ക് പോയ രണ്ട് വള്ളങ്ങൾ, യാത്രാ മദ്ധ്യേ കാ​റ്റിൽപ്പെട്ട് മുങ്ങി. ഈ വള്ളങ്ങളിലുണ്ടായിരുന്ന തൊഴിലാളികളെ മ​റ്റ് വള്ളക്കാർ രക്ഷിച്ചു.

ഇന്നലെ ഉച്ചയ്ക്ക് രണ്ടോടെ ചേന്നവേലി കടപ്പുറത്ത് നങ്കൂരമിട്ടിരുന്ന അൽഫോൺസ വള്ളമാണ് തകർന്നത്. ഒ​റ്റമശേരി കുടിയാംശേരിൽ ബൈജു ലീഡറായുള്ള വള്ളം മത്സ്യബന്ധനം കഴിഞ്ഞ് നങ്കൂരമിട്ടിരിക്കുകയായിരുന്നു.35 ലക്ഷത്തോളം രൂപയുടെ നഷ്ടം സംഭവിച്ചതായി കണക്കാക്കുന്നു. അർത്തുങ്കൽ പാല്യത്തൈയിൽ അനീഷിന്റെ സാന്താ മരിയ,സജി കാട്ടൂരിന്റെ ഹോളി സ്പിരി​റ്റ് എന്നീ വള്ളങ്ങളാണ് കൊച്ചി ഹാർബറിലേക്കുള്ള യാത്രാ മദ്ധ്യേ എറണാകുളം ഭാഗത്ത് മുങ്ങിയത്. 20 ലക്ഷത്തോളം രൂപയുടെ നഷ്ടം സംഭവിച്ചു.