ചേർത്തല: എസ്.എൻ ട്രസ്റ്റ് പൊതു തിരഞ്ഞെടുപ്പ് ബഹിഷ്കരിക്കാനുള്ള ശ്രീനാരായണ സേവാ സംഘം, ശ്രീനാരായണ ട്രസ്റ്റ് സംരക്ഷണ സമിതി, ശ്രീനാരായണ സഹോദര ധർമ്മവേദി എന്നീ സംഘടനകളുടെ തീരുമാനം തോൽവി മുന്നിൽ കണ്ടുള്ള ഭീതി മൂലമാണെന്ന് എസ്.എൻ.ഡി.പി യോഗം സംരക്ഷണ സമിതി ആലപ്പുഴ ജില്ലാ കമ്മിറ്റി അഭിപ്രായപ്പെട്ടു. ജനാധിപത്യ സംവിധാനത്തിൽ നിന്ന് മാറി നിൽക്കാതെ സ്ഥാനാർത്ഥികളെയെങ്കിലും നിറുത്തി അംഗബലം കാട്ടുകയാണ് വേണ്ടത്. എതിർ പാനലിനൊപ്പമുള്ള സ്ഥാനാർത്ഥികളെ പോലും കണ്ടെത്താൻ പറ്റാത്ത ജാള്യത മറയ്ക്കാനാണ് ബഹിഷ്കരണ ആഹ്വാനം. ഇത് തരംതാഴ്ന്ന നടപടിയാണ്. മത്സര രംഗത്ത് വന്നശേഷം അവസാനഘട്ടത്തിൽ പിൻമാറുന്നതിലൂടെയുണ്ടാവുന്ന നഷ്ടം ഇവരിൽ നിന്ന് ഈടാക്കാൻ ട്രസ്റ്റ് നേതൃത്വം നിയമ നടപടി സ്വീകരിക്കണമെന്നും യോഗം ആവശ്യപ്പെട്ടു. സംരക്ഷണ സമിതി ജില്ലാ പ്രസിഡന്റ് എം.മനോജ് അദ്ധ്യക്ഷത വഹിച്ചു.ജില്ലാ സെക്രട്ടറി ജയൻ സുരേന്ദ്രൻ,സുരാജ് നെടുമ്പ്രക്കാട്,രാജീവ് അയ്യപ്പഞ്ചേരി,ദീപക് തുറവൂർ എന്നിവർ സംസാരിച്ചു.