ഹരിപ്പാട്: മത്സ്യബന്ധനത്തിനിടെ കടലിൽ അകപ്പെട്ട തൊഴിലാളികളെ മറൈൻ എൻഫോഴ്സ്മെന്റ് രക്ഷപ്പെടുത്തി. ഇന്നലെ രാവിലെ പതിനൊന്നരയോടെ വലിയഴീക്കൽ പൊഴിക്കു മൂന്ന് കിലോമീറ്റർ പടിഞ്ഞാറു ഭാഗത്തായി ശ്രീഹരി എന്ന വള്ളമാണ് അപകടത്തിൽപ്പെട്ടത്. ആറാട്ടുപുഴ സ്വദേശികളായ അനന്തു, ശ്രീഹരി. ഗിരീഷ് എന്നീ തൊഴിലാളികളാണ് വെള്ളത്തിലുണ്ടായിരുന്നത്.

കാരിയർ വള്ളമായ ഇതിലേക്ക് വലിയ വള്ളത്തിൽ നിന്നു മീൻ കയറ്റുന്നതിനിടെയാണ് അപകടം ഉണ്ടായി വെള്ളം മുങ്ങിയത്. കടലിൽ ശക്തമായ തിരയുള്ളതിനാൽ മറ്റു വള്ളങ്ങൾക്കു രക്ഷാപ്രവർത്തനം നടത്താൻ സാധിച്ചില്ല. തുടർന്നാണ് മറൈൻ എൻഫോഴ്സ്മെന്റിനെ വിവരം അറിയിച്ചത്. അപകടത്തിൽപ്പെട്ട വള്ളവും മറൈൻ എൻഫോഴ്സ്മെന്റ് ബോട്ടിൽ കെട്ടിവലിച്ച് തീരത്തെത്തിച്ചു. മറൈൻ എൻഫോഴ്സ്മെന്റ് ഉദ്യോഗസ്ഥരായ സി.പി.ഒ ജോസഫ് ജോൺ, ലൈഫ് ഗാർഡുകളായ ജയൻ, ജോർജ് എന്നിവരാണ് രക്ഷാപ്രവർത്തനത്തിൽ പങ്കെടുത്തത്.