ചേർത്തല:തണ്ണീർമുക്കത്ത് വ്യാഴാഴ്ച നടത്തിയ കൊവിഡ് പരിശോധനയിൽ മുഴുവൻ പേരും നെഗ​റ്റീവായി.ജി​ല്ലാമെഡിക്കൽ ഓഫീസറുടെ കീഴി​ലുള്ള മൊബൈൽ കോവിഡ് പരിശോധനാ ടീമിന്റെ നേതൃത്വത്തിലായിരുന്നു പരിശോധന. ഗ്രാമപഞ്ചായത്തിൽ ഇനിമുതൽ ഗർഭിണികൾ,നവജാത ശിശുവും അമ്മയും,മാരകമായ രോഗങ്ങൾ ഉളളവർ,മ​റ്റ് രോഗങ്ങൾ ഉള്ളവർ,പ്രതിരോധ ശേഷി കുറഞ്ഞവർ,പന്ത്റണ്ട് വയസിന് താഴെയും 60 വയസിന് മുകളിലും പ്രായമുള്ളവർ എന്നിവരൊഴികെയുള്ളവർക്ക് ഭവനങ്ങളിൽ തന്നെ കൊവിഡ് 19 ചികിത്സ ലഭ്യമാക്കുന്ന ടെലിമെഡിസിൻ സംവിധാനത്തോടുകൂടിയുള്ള ഗൃഹചികിത്സാ രീതി വിജയകരമായി നടപ്പിലാക്കി. കൊവിഡ് പോസി​റ്റീവായ രോഗി ഗൃഹ ചികിത്സയിലൂടെ രോഗവിമുക്തമായതിനെ തുടർന്ന് കഴിഞ്ഞ ദിവസം നടന്ന പരിശോധനയിൽ പോസിറ്റീവായ മൂന്ന് പേർകൂടി ഗൃഹ ചികിത്സ പദ്ധതിയിൽ പങ്കാളികളായി ചികിത്സ ആരംഭിച്ചു.ദിവസേനേ ഫോൺ മുഖേനേയുള്ള അന്വേഷണവും ടെലിമെഡിസിൽ സംവിധാനത്തോടു കുടിയുള്ള ചികിത്സയും ഫിങ്കർ പൾസ് ഒക്‌സീമീ​റ്റർ അളവ് റിപ്പോർട്ടിലൂടെയുമാണ് പ്രവർത്തനം സജ്ജമാക്കിയിട്ടുള്ളതെന്ന് മെഡിക്കൽ ഓഫീസർ ഡോ.അമ്പിളി പറഞ്ഞു. ഇതിനായി അൻപത് ഫിങ്കർ പൾസ് ഓക്‌സീമീ​റ്റർ കൂടി വാങ്ങുന്നതിന് പഞ്ചായത്ത് അംഗീകാരം നൽകി. രോഗിയുമായി ടെലി കൺസൾട്ടേഷൻ നടത്തുമ്പോൾ രോഗിയുടെ പൂർണ്ണ സഹകരണത്തോടുകൂടി കൈമാറുന്ന വിവരങ്ങൾ മെഡിക്കൽ ടീം ക്രോഡീകരിച്ച് ജില്ലാതലത്തിലേക്ക് റിപ്പോർട്ട് ചെയ്യുന്നതാണ് പ്രവർത്തന രീതി. സാമ്പിൾ പരിശോധനയിലൂടെ രോഗ നിർണയം നടത്തി പോസി​റ്റീവാണെന്ന് ഉറപ്പായാൽ ഐസൊലേഷനുവേണ്ടി മാ​റ്റിവെച്ച മുറിയിൽ ശരിയായ വായു സഞ്ചാരവും ടോയ്‌ല​റ്റ് സംവിധാനവും ഉറപ്പ് വരുത്തി മുറിക്കുളളിൽ തന്നെ ചികിത്സ ഒരുക്കും. പ്രാദേശിക ആരോഗ്യ പ്രവർത്തകരുടെ ടീം അനുബന്ധ ചെക്ക് ലിസ്​റ്റിന്റെ സഹായത്തോടെ രണ്ട് ദിവസത്തിലൊരിക്കൽ നിരീക്ഷിക്കുമെന്ന് ഗ്രാമപഞ്ചായത്ത് പ്രസിഡന്റ് അഡ്വ.പി.എസ് ജ്യോതിസ് പറഞ്ഞു.