നിർമ്മാണോദ്ഘാടനം ഇന്ന്
ആലപ്പുഴ: ലൈഫ് മിഷന്റെ മൂന്നാം ഘട്ടത്തിലെ ഭൂരഹിത ഭവനരഹിത ഗുണഭോക്താക്കൾക്ക് ജില്ലയിൽ നിർമ്മിക്കുന്ന രണ്ട് പാർപ്പിട സമുച്ചയങ്ങളുടെ നിർമ്മാണോദ്ഘാടനം മുഖ്യമന്ത്രി പിണറായി വിജയൻ ഓൺലൈനായി ഇന്ന് നിർവഹിക്കും.രാവിലെ 11.30ന് മണ്ണഞ്ചേരിയിലെ ഭവന സമുച്ചയത്തിന് മന്ത്രി ജി.സുധാകരനും പള്ളിപ്പാട് നിർമ്മിക്കുന്ന ഭവന സമുച്ചയത്തിന് പ്രതിപക്ഷനേതാവ് രമേശ് ചെന്നിത്തലയും തറക്കല്ലിടും. മന്ത്രി എ.സി. മൊയ്തീൻ അദ്ധ്യക്ഷത വഹിക്കും. മന്ത്രി ഇ.ചന്ദ്രശേഖരൻ, മന്ത്രി തോമസ് ഐസക്, മന്ത്രി കെ.കൃഷ്ണൻകുട്ടി, മന്ത്രി എ.കെ.ബാലൻ, മന്ത്രി എം.എം.മണി, മന്ത്രി ജെ.മേഴ്സികുട്ടിയമ്മ, മന്ത്രി ടി.പി.രാമകൃഷ്ണൻ, മന്ത്രി കെ.കെ.ശൈലജ, ചീഫ് സെക്രട്ടറി വിശ്വാസ് മേത്ത, നവകേരള കർമ്മ പദ്ധതി കോ ഓഡിനേറ്റർ ചെറിയാൻ ഫിലിപ്പ് തുടങ്ങിയവർ സംസാരിക്കും. തദ്ദേശസ്വയം ഭരണ വകുപ്പ് പ്രിൻസിപ്പൽ സെക്രട്ടറി ശാരദ മുരളീധരൻ സ്വാഗതം പറയും. എ.എം.ആരിഫ് എം.പി., ജില്ലാ പഞ്ചായത്ത് പ്രസിഡന്റ് ജി.വേണുഗോപാൽ, കളക്ടർ എ.അലക്‌സാണ്ടർ, മറ്റ് ജനപ്രതിനിധികൾ തുടങ്ങിയവർ പങ്കെടുക്കും.ലൈഫ് മിഷൻ ജില്ലാ കോ ഓഡിനേറ്റർ പി.പി.ഉദയസിംഹൻ, പ്രോജക്ട് ഡയറക്ടർ എ.പ്രദീപ് കുമാർ എന്നിവർ റിപ്പോർട്ട് അവതരിപ്പിക്കും.
28 ഫ്ളാറ്റുകൾ, നിർമാണച്ചെലവ് 4.75 കോടി
മണ്ണഞ്ചേരി കണ്ണാട്ടുകടവിൽ നാലുനിലകളിലായി 28 ഫ്‌ളാറ്റുകളാണ് ഇവിടെ നിർമ്മിക്കുന്നത്. 54 സെന്റ് സ്ഥലത്താണ് ഭവന സമുച്ചയം. 445 ചതു. അടി വിസ്തീർണത്തിൽ നിർമിക്കുന്ന ഓരോ ഫ്‌ളാറ്റിലും രണ്ട് ബെഡ് റൂം, ഹാൾ, അടുക്കള, ടോയ്‌ലറ്റ് എന്നിങ്ങനെയാണ് ഉണ്ടാകുക. 4.75 കോടി രൂപ ചെലവിൽ നിർമ്മിക്കുന്ന ഭവന സമുച്ചയത്തിന്റെ നിർമ്മാണം ഏറ്റെടുത്തിരിക്കുന്നത് അഹമ്മദാബാദ് ആസ്ഥാനമായുള്ള മിറ്റ്‌സുമി ഹൗസിംഗ് ലിമിറ്റഡ് ആണ്. സമുച്ചയത്തിന്റെ ഭാഗമായി മുതിർന്നവർക്കുള്ള പ്രത്യേക മുറി, സിക്ക് റൂം, കോമൺ ഫെസിലിറ്റി റൂം, ക്രീച്ചേ, റിക്രിയേഷൻ റൂം, ഇലക്ട്രിക്കൽ റൂം, മലിനജല ശുചീകരണ പ്ലാന്റ്, സൗരോർജ സംവിധാനം എന്നിവ ഉണ്ടായിരിക്കും. ലൈഫ് മിഷനിൽ മണ്ണഞ്ചേരി ഗ്രാമപഞ്ചായത്തിൽ ഒന്നാംഘട്ടത്തിൽ 53 വീടുകളും രണ്ടാംഘട്ടത്തിൽ ഏറ്റെടുത്ത 382 വീടുകളിൽ 350 വീടുകളും ഇതുവരെ പൂർത്തീകരിച്ചിട്ടുണ്ട്.
44 ഫ്ളാറ്റുകൾ, നിർമാണച്ചെലവ് 7.10 കോടി
പള്ളിപ്പാട് ഗ്രാമപഞ്ചായത്തിൽ നാല് നിലകളിലായി നിർമിക്കുന്ന 44 ഫ്‌ളാറ്റുകളുടെ തറക്കല്ലിടീൽ. 7.10 കോടി രൂപ നിർമാണ ചെലവിൽ നിർമിക്കുന്ന ഭവന സമുച്ചയത്തിന്റെ നിർമാണം ഏറ്റെടുത്തിരിക്കുന്നത് അഹമ്മദാബാദ് ആസ്ഥാനമായുള്ള മിറ്റ്‌സുമി ഹൗസിംഗ് ലിമിറ്റഡ് ആണ്. 445 ചതു. അടി വിസ്തീർണത്തിൽ നിർമിക്കുന്ന ഓരോ ഫ്‌ളാറ്റിലും രണ്ട് ബെഡ് റൂം, ഹാൾ, അടുക്കള, ടോയ്‌ലെറ്റ് എന്നിങ്ങനെയാണ് ഉണ്ടാകുക. പള്ളിപ്പാട് ഗ്രാമപഞ്ചായത്തിന്റെ 50 സെന്റ് സ്ഥലത്ത് നിർമിക്കുന്ന ഭവന സമുച്ചയത്തിൽ മുതിർന്നവർക്കുള്ള പ്രത്യേക മുറി,സിക്ക് റൂം, കോമൺ ഫെസിലിറ്റി റൂം, ക്രീച്ചേ, റിക്രിയേഷൻ റൂം, ഇലക്ട്രിക്കൽ റൂം, മലിനജല ശുചീകരണ പ്ലാന്റ്, സൗരോർജ സംവിധാനം എന്നിവ ഉണ്ടായിരിക്കും. ലൈറ്റ് ഗേജ് സ്റ്റീൽ ഫ്രെയിം ഘടകങ്ങൾ ഉപയോഗിച്ചുള്ള പ്രീ ഫാബ്രിക്കേഷൻ സാങ്കേതികവിദ്യ അടിസ്ഥാനമാക്കിയാണ് ഇരു ഭവന സമുച്ചയങ്ങളുടെയും നിർമ്മാണം. ആറുമാസമാണ് നിർമ്മാണ കാലാവധി. പള്ളിപ്പാട് ഗ്രാമപഞ്ചായത്തിൽ ഒന്നാം ഘട്ടത്തിൽ ഏറ്റെടുത്ത 55 വീടുകളും രണ്ടാംഘട്ടത്തിൽ ഏറ്റെടുത്ത 66 വീടുകളിൽ 56 വീടുകളും പൂർത്തീകരിച്ചിട്ടുണ്ട്.