ന്യൂഡൽഹി: യു.പിയിലെ അസംഗഡ്​ ജില്ലയിൽ പരിശീലക വിമാനം തകർന്നുവീണ്​ ട്രെയിനി പൈലറ്റ്​ മരിച്ചു. ഹരിയാനയിലെ പൽവാൽ സ്വദേശിയും ഇന്ദിരാഗാന്ധി രാഷ്ട്രീയ ഉഡാൻ അക്കാദമിയിലെ വിദ്യാർത്ഥിയുമായ കൊണാർക്ക് സരൺ (21)നാണ് ഞായറാഴ്​ച രാവിലെ 11ഓടെ സാരയ്​മീർ പൊലീസ്​ സ്​റ്റേഷന്​ കീഴിലെ കുഷ്​വപുരവ ​ഗ്രാമത്തിൽ ചെറുവിമാനം വയലിൽ തകർന്ന് വീണതിനെത്തുടർന്ന് മരിച്ചത്.

അപകടത്തിൽപ്പെട്ട ടി..ബി.20 വിമാനത്തിൽ കൊണാർക്ക് മാത്രമേയുണ്ടായിരുന്നുള്ളൂ.ഇദ്ദേഹം സമർത്ഥനായ പൈലറ്റാണെന്നും മേഘങ്ങൾക്കിടയിൽപ്പെട്ട ദിശതെറ്റിയാണ് അപകടമുണ്ടായതെന്നുമാണ് പ്രാഥമിക നിഗമനമെന്നും അസംഗഡ്​ എസ്​.പി സുധീർ കുമാർ പറഞ്ഞു. ഗ്രാമവാസികൾ വിവരം അറിയിച്ചതിനെ തുടർന്ന്​ പൊലീസ്​ സ്​ഥല​​ത്തെത്തി മൃതദേഹം മോർച്ചറിയിലേക്ക്​ മാറ്റി.