മൂവാറ്റുപുഴ: കൊവിഡ് പ്രതിരോധ പ്രവർത്തങ്ങളിൽ ഗ്രന്ഥശാലകളും കൈകോർക്കുന്നു. മുഖ്യമന്ത്രിയുടെ ദുരിതാശ്വാസ നിധിയിലേക്ക് താലൂക്ക് ലൈബ്രറികൗൺസിലിന്റെ നേതൃത്വത്തിൽ ഗ്രന്ഥശാലകളിൽ നിന്നും കഴിയുന്ന രീതിയിൽ സംഭാവന സമാഹരിച്ചു നൽകുന്നതോടൊപ്പം ഗ്രന്ഥശാല തല കൊവിഡ് കർമ്മസേന സന്നദ്ധ പ്രവർത്തനവും സംഘടിപ്പിക്കുന്നു. താലൂക്ക് ലൈബ്രറി കൗൺസിലിന്റെ നേതൃത്വത്തിൽ മുഖ്യമന്ത്രിയുടെ ദുരിതാശ്വാസ നിധിയിലേക്ക് നൽകുന്നതിനുള്ള ഫണ്ട് സമാഹരണത്തിന്റെ ഉദ്ഘാടനം പാമ്പാക്കുട പബ്ലിക്ക് ലൈബ്രറി നൽകുന്ന 4000 രൂപയുടെ ചെക്ക് ലൈബ്രറി പ്രസിഡന്റ്‌ സി.ടി ഉലഹന്നാൻ മാസ്റ്ററിൽ നിന്നും താലൂക്ക് ലൈബ്രറി കൗൺസിൽ പ്രസിഡന്റ്‌ ജോഷി സ്കറിയ ഏറ്റുവാങ്ങി. ലൈബ്രറി കൗൺസിൽ ജില്ലാ ജോയിന്റ് സെക്രട്ടറി കെ.പി.രാമചന്ദ്രൻ , താലൂക്ക് സെക്രട്ടറി സി.കെ.ഉണ്ണി, താലൂക്ക് ജോയിന്റ് സെക്രട്ടറി വിജയൻ മാസ്റ്റർ , ജില്ലാ കൗൺസിൽ അംഗങ്ങളായ കെ.കെ. ജയേഷ് , കെ.എൻ. മോഹനൻ, ഡോ. രാജി കെ.പോൾ , താലൂക്ക് എക്സിക്യൂട്ടീവ് അംഗങ്ങളായ സിന്ധു ഉല്ലാസ്, ജസ്റ്റിൻ ജോസ്, വി.ടി. യോഹന്നാൻ എന്നിവർ ചടങ്ങിൽ പങ്കെടുത്തു. ഗ്രന്ഥശാലകൾ ദുരിതാശ്വാസ നിധിയിലേക്ക് നൽകുവാനുദ്ദേശിക്കുന്ന സംഭാവന തുക ഗ്രന്ഥശാല ദിനമായ സെപ്തംബർ 14 മുമ്പ് താലൂക്ക് ലൈബ്രറി കൗൺസിൽ ഓഫീസിൽ എത്തിച്ച് നൽകണമെന്ന് സെക്രട്ടറി സി.കെ. ഉണ്ണി അറിയിച്ചു.