കൊച്ചി : ഡെപ്യൂട്ടി ചീഫ് ഇലക്ട്രിക്കൽ ഇൻസ്‌പെക്ടറുടെ കാര്യാലയത്തിലെ നവീകരിച്ച മീറ്റർ ടെസ്റ്റിംഗിന്റെയും സ്റ്റാന്റേർഡ്‌സ് ലാബിന്റെയും അഡ്വാൻസ്ഡ് എനർജി മീറ്റർ ടെസ്റ്റ് ബെഞ്ചിന്റെയും ഉദ്ഘാടനം മന്ത്രി എം.എം. മണി വീഡിയോ കോൺഫറൻസിലൂടെ നിർവഹിച്ചു. അഡ്വാൻസ്ഡ് എനർജി മീറ്റർ ടെസ്റ്റ് ബെഞ്ച് ഉപയോഗിച്ച് പത്ത് എനർജി മീറ്റർ ഒരേസമയം ടെസ്റ്റ് ചെയ്യാം. വൈദ്യുതി വിതരണം അപകടരഹിതമാക്കുന്നതിനും മീറ്ററുകളും ഉപകരണങ്ങളും കൃത്യതയോടെ പരിശോധിക്കുന്നതിനും സൗകര്യമാകുമെന്നും അദ്ദേഹം പറഞ്ഞു. എറണാകുളം ബോട്ടുജെട്ടിക്ക് സമീപമുള്ള റവന്യൂടവറിലെ കെട്ടിടത്തിലേക്ക് പ്രവർത്തനം മാറിയിട്ടുള്ള ഇൻസ്‌പെക്ടറേറ്റ് വകുപ്പിന്റെ പുതിയ ഓഫീസിലാണ് ലാബ് സജ്ജീകരിച്ചിരിക്കുന്നത്.
ടി.ജെ. വിനോദ് എം.എൽ.എ, കൗൺസിലർ കെ.വി.പി കൃഷ്ണകുമാർ, പി.കെ. പുരുഷോത്തമൻ, ചീഫ് ഇലക്ട്രിക്കൽ ഇൻസ്‌പെക്ടർ വി.സി. അനിൽകുമാർ, ഡെപ്യൂട്ടി ചീഫ് ഇലക്ട്രിക്കൽ ഇൻസ്‌പെക്ടർ വി.കെ. സാഗർ തുടങ്ങിയവർ പങ്കെടുത്തു.