# കൊലപാതകമെന്ന് സൂചന

വൈപ്പിൻ : കുഴുപ്പിള്ളി പള്ളത്താംകുളങ്ങര ബീച്ചിൽ യുവാവിന്റെ മൃതദേഹം കണ്ടെത്തി. ചെറായി രാമവർമ്മ കിഴക്ക് പാഞ്ചാലതുരുത്ത് പരേതനായ കല്ലുമടത്തിൽ പ്രസാദിന്റെ മകൻ പ്രണവാണ് (23) മരിച്ചത്. കുറച്ചുനാൾ മുമ്പ് ഇയാളുടെ വീട് ഏതാനുംപേർ ചേർന്ന് ആക്രമിച്ചിരുന്നു. തിങ്കളാഴ്ച രാത്രി വീട്ടിലുണ്ടായിരുന്ന യുവാവ് ഫോൺ വന്നതിനെത്തുടർന്ന് പള്ളത്താംകുളങ്ങര ബീച്ചിലേക്ക് പോയതാണെന്ന് പറയപ്പെടുന്നു. പുഞ്ചപൊക്കത്ത് കുടുംബാംഗം ഷെറീനയാണ് മാതാവ്. സഹോദരൻ സൗരവ്.

ഇന്നലെ പുലർച്ചെ നാലരക്ക് ബീച്ച് റോഡിലൂടെ വന്ന മത്സ്യത്തൊഴിലാളികളാണ് പള്ളത്താംകുളങ്ങരയിൽ നിന്ന് ബീച്ചിലേക്ക് കയറുന്നിടത്ത് ട്രാൻസ്‌ഫോർമറിനരികെ ടൈൽവിരിച്ച റോഡിൽ മൃതദേഹം കണ്ടത്. തലയ്ക്കും കൈക്കും അടിയേറ്റ് ചോരയിൽ കുതിർന്ന നിലയിലായിരുന്നു. മൃതദേഹത്തിനരികെ ശീമക്കൊന്ന പത്തലും പൊട്ടിയ ട്യൂബ് ലൈറ്റുകളും കിടപ്പുണ്ടായിരുന്നു.

റൂറൽ എസ്. പി കെ. കാർത്തിക്, ഡിവൈ. എസ്. പി.ജി. വേണു, ഞാറക്കൽ സി.ഐ പി.എസ്. ധർമ്മജിത്ത്, പറവൂർ സി. ഐ ഷോജോ വർഗീസ് എന്നിവർ സ്ഥലത്തെത്തി അന്വേഷണം നടത്തി. ഡോഗ് സ്‌ക്വാഡും സ്ഥലത്ത് പരിശോധന നടത്തി.