ആലുവ: പെരുമ്പാവൂർ ദേശസാൽകൃത റോഡിൽ കുട്ടമശേരി ആനിക്കാട് കവലയിൽ പിക്കപ്പ് വാൻ നിയന്ത്രണം വിട്ട് മതിലും വീടിന്റെ മുൻഭാഗവും ഇടിച്ച് തകർത്തു. ഇന്നലെ പുലർച്ചെ അഞ്ച് മണിയോടെയാണ് അപകടം. മൂന്നാറിൽ നിന്നും പച്ചക്കറിയുമായി ആലുവയിലേക്ക് വന്ന വാഹനം റോഡിന് സമീപമുള്ള കാനയിലേക്ക് ചാടിയ ശേഷമാണ് ചെറോടത്ത് യാക്കൂബിന്റെ വീടും മതിലും തകർത്തത്. അപകടത്തിൽ വാൻ ഡ്രൈവർ നിസാര പരിക്കുകളോടെ രക്ഷപ്പെട്ടു. റോഡിന് വീതി കുറഞ്ഞ ഇവിടെ കാനയിൽ വാഹനങ്ങൾ ചാടിയുള്ള അപകടങ്ങൾ പതിവാണ്. റോഡിന്റെ ടാറിംഗിനോട് ചേർന്നാണ് കാന. കാനക്കരികിൽ പുല്ല് വളർന്നിരിക്കുന്നതിനാൽ കാന കാണാനും പ്രയാസമാണ്. മഴക്കാലമാരംഭിക്കും മുമ്പ് പഞ്ചായത്ത് കാന ക്ലീൻ ചെയ്തെങ്കിലും ഇപ്പോൾ പരിസരം പുല്ല് വളർന്നിരിക്കുകയാണ്. കാൽ നടയാത്രക്കാർ ഭയപ്പാടോടെയാണ് സഞ്ചരിക്കുന്നത്.

റോഡിൽ കൂടി വേണം കാൽനടയാത്രക്കാർ നടക്കാൻ. വാഹനങ്ങൾ വരുമ്പോൾ മാറി നിൽക്കാൻ സ്ഥലമില്ല. ഈ ഭാഗത്ത് കാനക്ക് മുകളിൽ സ്ലാബ് ഇട്ടാൽ അപകടമൊഴിവാക്കാം. കഴിഞ്ഞ ആഴ്ചയും ഇവിടെ അപകടം നടന്നിരുന്നു.