കുമളി :പഞ്ചായത്തിലെ നാലാം വാർഡിൽ ഉൾപ്പെട്ട പത്തുമുറി കാഞ്ഞിരംപടി റോഡ് തുറന്നു. പ്രദേശവാസികളുടെ നാളുകളായുള്ള സ്വപ്‌നമാണ് ഇതോടെ യാഥാർത്ഥ്യമായത്.റോഡ് നിർമ്മാണം ദുഷ്‌ക്കരമായ പ്രദേശത്ത് ലഭിച്ച ജനപങ്കാളിത്തമാണ് പുതിയ റോഡിന്റെ പിറവിക്ക് വഴിയൊരുക്കിയത്. നിർമ്മാണം പൂർത്തീകരിച്ച റോഡിന്റെ ഉദ്ഘാടനം പഞ്ചായത്ത് പ്രസിഡന്റ് ഷീബാ സുരേഷ് നിർവ്വഹിച്ചു. ഒന്നും രണ്ടുംഘട്ട നിർമ്മാണ ജോലികളാണ് പൂർത്തീകരിച്ചിട്ടുള്ളതെന്നും മൂന്നാംഘട്ട നിർമ്മാണ ജോലികൾ ഉടൻ നടക്കുമെന്നും പ്രസിഡന്റ് പറഞ്ഞു. പ്രദേശവാസികൾ റോഡ് നിർമ്മാണത്തിന് സ്ഥലം വിട്ടു നൽകാൻ തയ്യാറായതോടെയായിരുന്നു രണ്ട് അടി വീതി മാത്രമുണ്ടായിരുന്ന നടപ്പു വഴി 16 അടി വീതിയിൽ പുനർനിർമ്മിക്കാൻ സാഹചര്യമൊരുങ്ങിയത്. തുടർന്ന് നിർമ്മാണ ജോലികളിൽ പഞ്ചായത്ത് ഇടപെടൽ നടത്തി. പഞ്ചായത്ത് പ്ലാൻ ഫണ്ടിൽ നിന്നും 10 ലക്ഷം രൂപ വകയിരുത്തി ആദ്യഘട്ട കോൺക്രീറ്റ് ജോലികൾ പൂർത്തീകരിച്ചു. തൊഴിലുറപ്പ് പദ്ധതിയിൽ ഉൾപ്പെടുത്തി 35 ലക്ഷം രൂപാ കൂടി വകയിരുത്തി രണ്ടാം ഘട്ട കോൺക്രീറ്റ് ജോലികളും പൂർത്തീകരിച്ചു. മൂന്നാം ഘട്ടമായി 20 ലക്ഷത്തോളം രൂപ തൊഴിലുറപ്പ് പദ്ധതിയിൽ തന്നെ ഉൾപ്പെടുത്തി ശേഷിക്കുന്ന കോൺക്രീറ്റ് ജോലികൾക്കായി വിനിയോഗിക്കും.പഞ്ചായത്തംഗം സൺസി മാത്യു ചടങ്ങിൽ അദ്ധ്യക്ഷത വഹിച്ചു. പ്രദേശത്തെ 35ഓളം കുടുംബങ്ങൾക്ക് പുതിയ റോഡിന്റെ പ്രയോജനം ലഭിക്കും.