ഇടുക്കി: പാഞ്ചാലിമേട് ടൂറിസം കേന്ദ്രത്തിന്റെ രണ്ടാംഘട്ട വികസന പദ്ധതികളുടെ നിർമ്മാണോദ്ഘാടനം ഇന്ന് രാവിലെ 10ന് മന്ത്രി കടകംപള്ളി സുരേന്ദ്രൻ വീഡിയോ കോൺഫറൻസിലൂടെ നിർവഹിക്കും. ഇ.എസ്. ബിജിമോൾ എം.എൽ.എ അദ്ധ്യക്ഷത വഹിക്കും. പെരുവന്താനം പഞ്ചായത്തിന്റെയും വിനോദസഞ്ചാര വകുപ്പിന്റെയും ആഭിമുഖ്യത്തിലാണ് പദ്ധതി നടപ്പാക്കുന്നത്. മൂന്നു കോടി രൂപ ചെലവഴിച്ചുള്ള പദ്ധതിയിൽ പാഞ്ചാലിക്കുളം നവീകരിക്കൽ, നടപ്പാത, ചെക്ക്ഡാം, വാട്ടർ ആക്ടിവിറ്റി എക്യൂപ്‌മെന്റ്, ലൈറ്റിംഗ്, ഇരിപ്പിടങ്ങൾ, ലാൻഡ്സ്‌കേപിംഗ്, പാർക്കിംഗ് തുടങ്ങിയവയാണ് ഉൾക്കൊള്ളിച്ചിരിക്കുന്നത്. 2018ൽ നിർമ്മാണം പൂർത്തിയാക്കിയ ഒന്നാംഘട്ട പദ്ധതിയിൽ പ്രവേശനകവാടം, ടിക്കറ്റ് കൗണ്ടർ, റെയിൻ ഷെൽട്ടർ, അമിനിറ്റി സെന്റർ, ഫെൻസിംഗ് തുടങ്ങിയവ പൂർത്തീകരിച്ചിരുന്നു. ഒന്നാംഘട്ടം പൂർത്തീകരിച്ചതിനെ തുടർന്ന് ദിവസേന ആയിരക്കണക്കിന് ടൂറിസ്റ്റുകൾ വന്നുചേരുന്ന ജില്ലയിലെ ഒരു പ്രധാന ടൂറിസ്റ്റ് കേന്ദ്രമായി പാഞ്ചാലിമേട് മാറിക്കഴിഞ്ഞു. ഡീൻ കുര്യാക്കോസ് എം.പി മുഖ്യപ്രഭാഷണം നടത്തും. പെരുവന്താനം പഞ്ചായത്ത് പ്രസിഡന്റ് കെ.ടി. ബിനു സ്വാഗതം ആശംസിക്കും. ജില്ലാകളക്ടർ എച്ച്. ദിനേശൻ, ടൂറിസം വകുപ്പ് ഡയറക്ടർ പി. ബാലകിരൺ, അഴുത ബ്ലോക്ക് പഞ്ചായത്ത് പ്രസിഡന്റ് ആലീസ് സണ്ണി, ജില്ലാപഞ്ചായത്തംഗം മോളി ഡൊമിനിക്, പെരുവന്താനം പഞ്ചായത്ത് വൈസ് പ്രസിഡന്റ് ശ്യാമള മോഹനൻ തുടങ്ങിയവർ പങ്കെടുക്കും.