തൊടുപുഴ: ജില്ലാ ആയുർവേദ ആശുപത്രിയിൽ നിർമ്മിച്ച പുതിയ വനിതാ വാർഡ്, പേ വാർഡുകൾ, യോഗാ ഹാൾ എന്നിവയടങ്ങിയ പുതിയ ബ്ലോക്ക് പി.ജെ.ജോസഫ് എം.എൽ.എ. ഉദ്ഘാടനം ചെയ്തു. ജില്ലാ പഞ്ചായത്തിൽ നിന്ന് അനുവദിച്ച ഒരു കോടി രൂപാ ഉപയോഗിച്ചാണ് ബ്ലോക്കിന്റെ നിർമ്മാണം പൂർത്തീകരിച്ചത്. ഇതോടൊപ്പം പി.ജെ.ജോസഫ് എം.എൽ.എ. യുടെ ആസ്തി വികസന ഫണ്ടിൽ നിന്നും രണ്ട് കോടി രൂപാ ഉപയോഗിച്ച് നിർമ്മിക്കുന്ന കുട്ടികളുടെ വാർഡിന്റെ നിർമ്മാണോദ്ഘാടനവും നടത്തി.

കൊവിഡ് മാനദണ്ഡങ്ങളനുസരിച്ച് രോഗികളെ അഡ്മിറ്റ് ചെയ്യുവാനും എല്ലാവിധ പഞ്ചകർമ്മ ചികിത്സകൾ നടത്തുവാനും ആവശ്യമായ സൗകര്യങ്ങളോട് കൂടിയതാണ് പുതിയ മന്ദിരം. പൊതുജനങ്ങൾക്കും രോഗികൾക്കും പല ബാച്ചുകളിലായി യോഗാ പരിശീലനം നൽകുന്നതിനായി സജ്ജമാക്കിയ ഹാളിൽ നൂറോളം പേർക്ക് ഒരേ സമയം യോഗാ പരിശീലനം നൽകാനാവും.
കുട്ടികൾക്കായി നിർമ്മിക്കാൻ പോകുന്ന പുതിയ ബ്ലോക്കിൽ മികച്ച സൗകര്യങ്ങളോട് കൂടിയ പരിശോധനാ മുറികൾ, വെയിറ്റിംഗ് റൂമുകൾ, ഐ.പി. വാർഡുകൾ, പേ വാർഡുകൾ മുതലായവ ഉൾപ്പെടുത്തിയിട്ടുണ്ട്
ചടങ്ങിൽ ജില്ലാ പഞ്ചായത്ത് പ്രസിഡന്റ് കൊച്ചുത്രേസ്യാ പൗലോസ് അദ്ധ്യക്ഷത വഹിച്ചു. ജില്ലാ പഞ്ചായത്ത് വൈസ് പ്രസിഡന്റ് മാത്യു ജോൺ സ്വാഗതം പറഞ്ഞു. തൊടുപുഴ നഗരസഭ ചെയർപേഴ്‌സൺ സിസിലി ജോസ് മുഖ്യ പ്രഭാഷണം നടത്തി. ജില്ലാ പഞ്ചായത്തംഗങ്ങളായ സി.വി.സുനിത, മനോജ് തങ്കപ്പൻ, നഗരസഭാ കൗൺസിലർ പി.എ.ഷാഹുൽ ഹമീദ്, ചീഫ് മെഡിക്കൽ ഓഫീസർ ഡോ. സി.കെ.ഷൈലജ, സീനിയർ മെഡിക്കൽ ഓഫീസർ ഡോ..കെ ആർ. സുരേഷ് എന്നിവർ സംസാരിച്ചു. ആശുപത്രി സൂപ്രണ്ട് ഡോ. മാത്യൂസ് പി. കുരുവിള നന്ദി പറഞ്ഞു.