തൊടുപുഴ: ജില്ലയിലെ നൽവയലുകൾ രൂപമാറ്റം വരുത്താതെ സംരക്ഷിക്കുകയും കൃഷിക്കായി തയ്യാറാക്കുകയും ചെയ്യുന്ന ഉടമകൾക്ക് ഹെക്ടറിന് പ്രതിവർഷം 2000 രൂപ നിരക്കിൽ റോയൽറ്റി അനുവദിക്കും. നിലവിൽ നെൽകൃഷി ചെയ്യുന്നവർക്കും പയർ,​ പച്ചക്കറികൾ,​ എള്ള്,​ നിലക്കടല തുടങ്ങിയവ നെൽവയലുകളുടെ അടിസ്ഥാന സ്വഭാവത്തിൽ വ്യത്യാസം വരുത്താതെ കൃഷി ചെയ്യുന്ന നിലം ഉടമകൾക്കും അപേക്ഷിക്കാം. തരിശായി കിടക്കുന്ന നെൽവയലുകൾ സ്വന്തമായോ കർഷകർ/ ഏജൻസികൾ മുഖേനയോ ഉപയോഗ യോഗ്യമാക്കുന്ന ഉടമകൾക്കും റോയൽറ്റി അനുവദിക്കും. എന്നാൽ പ്രസ്തുത ഭൂമി തുടർന്നുള്ള മൂന്ന് വർഷം തുടർച്ചയായി തരിശായിട്ടാൽ റോയൽറ്റി ലഭിക്കില്ല. വീണ്ടും കൃഷി ആരംഭിച്ചാൽ റോയൽറ്റിക്ക് അർഹത നേടാം. റോയൽറ്റി തുക ബാങ്ക് അക്കൗണ്ടിലൂടെയാണ് ലഭിക്കുക. റോയൽറ്റിക്കുള്ള അപേക്ഷകൾ www.aims.kerala.gov.in എന്ന പോർട്ടലിലൂടെ ഓൺലൈനായി സമർപ്പിക്കാം. അപേക്ഷകൾ 30 ന് മുമ്പായി ഓൺലൈനായി സമർപ്പിക്കണം.