ഇടുക്കി: പുള്ളിക്കാനം വാഗമൺ, വാഗമൺകുവിലേറ്റം റോഡിന്റെ നിർമ്മാണോദ്ഘാടനം ഇന്ന് രാവിലെ 11.30ന് പൊതുമരാമത്ത് മന്ത്രി ജി. സുധാകരൻ വീഡിയോ കോൺഫറൻസിലൂടെ നിർവഹിക്കും. വാഗമൺ വി.ഡി.എ ഹാളിൽ നടക്കുന്ന യോഗത്തിൽ മന്ത്രി എം.എം. മണി അദ്ധ്യക്ഷത വഹിക്കും. അഡ്വ. ഡീൻ കുര്യാക്കോസ് എം .പി. മുഖ്യപ്രഭാഷണം നടത്തും. ഇ. എസ് ബിജിമോൾ എം..എൽ.എ സ്വാഗതവും എക്‌സി. എഞ്ചിനീയർ വി. പി ജാഫർഖാൻ നന്ദിയും പറയും.

എറണാകുളം തേക്കടി സ്റ്റേറ്റ് ഹൈവേയുടെ ഭാഗമായ പുള്ളിക്കാനംവാഗമൺ, വാഗമൺകുവിലേറ്റം റോഡ് കേരളത്തിന്റെ വിവിധ ഭാഗങ്ങളിൽ നിന്നും, പ്രധാനമായും വടക്കൻ ജില്ലകളിൽ നിന്നും എത്തുന്ന വിനോദസഞ്ചാരികൾക്കും മറ്റു ജനങ്ങൾക്കും , ജില്ലയിലെ പ്രധാന സ്ഥലങ്ങളായ തേക്കടി, കട്ടപ്പന, നെടുംകണ്ടം, ഉടുമ്പൻചോല, ദേവികുളം , മൂന്നാർ എന്നീ സ്ഥലങ്ങളിലേക്ക് സഞ്ചരിക്കാൻ ഉപകരിക്കും. അന്താരാഷ്ട്ര നിലവാരത്തിൽ ബിഎം .ബിസി ചെയ്യുകയും ആവശ്യമായ സ്ഥലങ്ങളിൽ സംരക്ഷണ ഭിത്തികൾ, കലുങ്കുകൾ, ഓടകൾ, ഇന്റർലോക്ക് ടൈൽ വിരിച്ച് ആവശ്യമായ ഭാഗങ്ങളിൽ സുരക്ഷാ ക്രമീകരണങ്ങൾ ഉൾപ്പെടയുളള പ്രവർത്തികളാണ് പദ്ധതിയിലുളളത്. 17.7 കോടി രൂപയുടെ ഭരണാനുമതിയാണ് പദ്ധതിക്കുളളത്.