കണ്ണൂർ: മന്ത്രി ഇ.പി ജയരാജന് കൊവിഡ് സ്ഥിരീകരിച്ചു. കണ്ണൂർ പാപ്പിനിശേരി അരോളിയിലെ വീട്ടിൽ നിരീക്ഷണത്തിലായിരിക്കെയാണ് രോഗം സ്ഥിരീകരിച്ചത്. മന്ത്രിയെ കണ്ണൂർ ഗവ. മെഡിക്കൽ കോളേജാശുപത്രിയിലേക്ക് മാറ്റി. ഭാര്യ പി.കെ.ഇന്ദിരക്കും കൊവിഡ് സ്ഥിരീകരിച്ചിട്ടുണ്ട്.

ഇന്നലെ ഡോക്ടർമാർ വീട്ടിലെത്തി സ്രവ പരിശോധന നടത്തി. ജയരാജന് നിലവിൽ രോഗ ലക്ഷണങ്ങളും ആരോഗ്യ പ്രശ്‌നങ്ങളുമില്ല.

സംസ്ഥാനത്ത് കൊവിഡ് സ്ഥിരീകരിക്കുന്ന രണ്ടാമത്തെ മന്ത്രിയാണ്.. കഴിഞ്ഞ ദിവസം സി.പി.എം സംസ്ഥാന സെക്രട്ടേറിയറ്റിൽ മന്ത്രി തോമസ് ഐസക്കിനൊപ്പം ഇ.പി ജയരാജനുമുണ്ടായിരുന്നു. അതിനു ശേഷം, തോമസ് ഐസക്കിന് കൊവിഡ് സ്ഥിരീകരിച്ചതിനെ തുടർന്നാണ് ജയരാജൻ കണ്ണൂരിലെ വീട്ടിൽ നിരീക്ഷണത്തിലായത്.