പഴയങ്ങാടി: പഴയങ്ങാടി ബസ് സ്റ്റാൻഡിനോട് ചേർന്നുള്ള ജില്ലാ ടൂറിസം പ്രമോഷൻ കൗൺസിലിന്റെ ടൂറിസ്റ്റ് ഫെസിലിറ്റി സെൻഡർ ഇനി മുതൽ സ്ത്രീ സൗഹൃദ വിശ്രമ കേന്ദ്രമാകും. 2006ൽ ടൂറിസം മന്ത്രി കെ.സി വേണുഗോപാൽ ഉദ്ഘാടനം ചെയ്ത കെട്ടിടമാണ് 28 ലക്ഷം രൂപ ചെലവിൽ നവീകരിച്ച് സ്ത്രീ വിശ്രമ കേന്ദ്രമാക്കിയത്.

ബസ് സ്റ്റാൻഡ് പുനർനിർമ്മാണ വേളയിൽ ഇവിടെ സ്ത്രീകളുടെ വിശ്രമ കേന്ദ്രം ഒരുക്കുമെന്ന് പഞ്ചായത്ത് അധികൃതർ പ്രഖ്യാപിച്ചിരുന്നു. സ്ത്രീകൾക്ക് വിശ്രമിക്കാനുള്ള സൗകര്യവും കെട്ടിടത്തിന്റെ താഴെ ഭാഗത്തും മുകൾ നിലയിലുമായി രണ്ട് മുലയൂട്ട് കേന്ദ്രങ്ങളും, മാടായി കാവിലേക്കായി ദൂര സ്ഥലങ്ങളിൽ നിന്ന് എത്തുന്ന യാത്രക്കാർക്ക് ശുചിയാകാനുള്ള മുറിയും മൂത്രപ്പുരയും ഒരുക്കിയിട്ടുണ്ട്.

പഴയങ്ങാടി ബസ് സ്റ്റാൻഡിലെത്തുന്ന സ്ത്രീ യാത്രക്കാരെ ലക്ഷ്യമിട്ടാണ് സ്ത്രീ സൗഹൃദ വിശ്രമ കേന്ദ്രം തുടങ്ങിയത്. ഇവരുടെ ദുരിതത്തിന് ഇതോടെ പരിഹാരമാകും. പ്ലാൻ ഫണ്ടും ശുചിത്വ മിഷൻ ഫണ്ടും ഉപയോഗിച്ചാണ് നവീകരണം. ഈ മാസാവസാനം യാത്രക്കാർക്കായി കേന്ദ്രം തുറക്കും.

ഡി. വിമല,

പ്രസിഡന്റ്, ഏഴോം ഗ്രാമ പഞ്ചായത്ത്