കാസർകോട്: ജെ.ഇ.ഇ മെയിനിൽ കേരളത്തിൽ ഒന്നാമതെത്തിയ അദ്വൈത് ദീപക്കിന്റെ വിജയത്തിൽ നാടിന് അഭിമാനം. ജനുവരിയിൽ നടന്ന ജെ.ഇ.ഇ മെയിൻ ആദ്യ ഘട്ട പരീക്ഷയിലും അദ്വൈത് കേരളത്തിൽ ഒന്നാമതായിരുന്നു. അദ്വൈതിന്റെ കുടുംബ വേരുകൾ വെളളിക്കോത്താണ്. വെള്ളിക്കോത്ത് പുതിയ വളപ്പിലെ പുറവങ്കര ബാലകൃഷ്ണൻ നായരുടെയും രമയുടെയും മകളും കോഴിക്കോട് ഇ.എസ്.ഐ. ആശുപത്രിയിലെ ഡോക്ടറുമായ ദർശനാ ബാലകൃഷ്ണന്റെയും ബേബി മെമ്മോറിയിൽ ആശുപതിയിലെ ഡോക്ടർ രജിൽ ദീപക്കിന്റെയും മകനാണ് അദ്വൈത്. ബാലകൃഷ്ണൻ നായരുടെ പിതാവിന്റെ ജേഷ്ഠനാണ് മഹാകവി പി. കുഞ്ഞിരാമൻ നായർ. കുടുംബ ചടങ്ങുകൾക്കെല്ലാം ഇവർ കാഞ്ഞങ്ങാട് എത്താറുണ്ട്. അദ്വൈത് ഒന്നാം ക്ലാസ് മുതൽ പത്താ ക്ലാസ് വരെ പഠിച്ചത് കോഴിക്കോട് സി.എം.ഐ ദേവഗിരി സ്കൂളിലായിരുന്നു. എന്നാൽ പിന്നീട് പ്ലസ്ടു വരെ കോച്ചിംഗ് സൗകര്യത്തിനായി ചങ്ങനാശ്ശേരിയിലേക്ക് മാറി. എഴുതിയ പരീക്ഷകളിൽ എല്ലാം റാങ്ക് തിളക്കത്തോടെ മുന്നേറിയ അദ്വൈതിന് ദേശീയ തലത്തിലുള്ള സയൻസ് റിസർച്ച് ഇൻസ്റ്റിറ്റ്യൂട്ട് നടത്തിയ പരിക്ഷയിലും ഉന്നത വിജയം നേടിയിരുന്നു. ഏഴാം ക്ലാസ് വിദ്യാർത്ഥിനി അവന്തിക സഹോദരിയാണ്.