കോഴിക്കോട്: പ്രളയക്കെടുതിയും കൊവിഡ് മഹാമാരി തുടങ്ങിയ കാരണങ്ങളാൽ യഥാസമയം വായ്പ തിരിച്ചടക്കാൻ കഴിയാത്ത ഇടപാടുകാരെ സഹായിക്കാൻ കേരള ബാങ്കിൽ നവകേരളീയം ഒറ്റത്തവണ തീർപ്പാക്കൽ പദ്ധതി ആരംഭിച്ചു. സ്വർണപ്പണയ വായ്പ, നിക്ഷേപ വായ്പ എന്നിവ ഒഴികെ 2020 ആഗസ്റ്റ് 31 വരെ പൂർണമായോ ഭാഗികമായോ കുടിശ്ശികയായ 50 ലക്ഷം രൂപവരെയുള്ള എല്ലാവിധ വായ്പകളും പലിശ ഇളവുകളോടെ അടച്ചുതീർക്കാൻ കഴിയും. 50 ലക്ഷം രൂപയ്ക്ക് മുകളിലുള്ള വായ്പകളിൽ പിഴപ്പലിശ പൂർണമായും ഒഴിവാക്കും.
നിഷ്‌ക്രിയ ആസ്തിയായ കാലപ്പഴക്കമുള്ള വായ്പകൾ, ആർബിട്രേഷൻ/ എക്‌സിക്യൂഷൻ, സർഫേസി കേസുകളിൽ ഉൾപ്പെട്ട വായ്പകൾ, വായ്പക്കാരൻ മരണപ്പെട്ട വായ്പകൾ, മാരകരോഗം ബാധിച്ചവരുടെയും പട്ടികജാതി പട്ടികവർഗ വിഭാഗങ്ങളുടെയും മത്സ്യത്തൊഴിലാളികളുടെയും വായ്പകൾ, ശമ്പള സർട്ടിഫിക്കറ്റിന്റെ ജാമ്യത്തിലെടുത്ത വായ്പകൾ, വിദ്യാഭ്യാസ വായ്പകൾ, എസ്.എച്ച്.ജി, ജെ.എൽ.ജി വായ്പകൾ തുടങ്ങിയവയിലെല്ലാം പലിശ ഇളവുകൾ അനുവദിക്കും.