കറുകച്ചാൽ: കിടപ്പുരോഗിയായ പിതാവിന്റെ വാരിയെല്ല് ചവിട്ടിയൊടിച്ച
മകൻ അറസ്റ്റിൽ. ശാന്തിപുരം റൈട്ടൺപറമ്പ് ചക്കുങ്കൽ ജോൺ തോമസിനെ (68) പരിക്കേൽപ്പിച്ച സംഭവത്തിൽ മകൻ ജോസി ജോണിനെ (37)യാണ് കറുകച്ചാൽ പൊലീസ് ഇന്നലെ അറസ്റ്റു ചെയ്തത്. ജോൺ ചെത്തിപ്പുഴയിലെ സ്വകാര്യാശുപത്രിയിൽ ചികിത്സയിലാണ്.

ഞായറാഴ്ച രാവിലെ 11 ഓടെ മദ്യപിച്ചെത്തിയ ജോസി പിതാവിനെ കട്ടിലിൽ നിന്നു വലിച്ചുനിലത്തിട്ട് ചവിട്ടുകയായിരുന്നു. തടയാനെത്തിയ അമ്മ അന്നമ്മയെയും (62) മർദിച്ചു. തുടർന്ന് വീട്ടിൽ നിന്ന് ഇറങ്ങിപ്പോയി. ബന്ധുക്കളുടെ സഹായത്തോടെ ജോണിനെ അന്നമ്മ ചെത്തിപ്പുഴയിലെ സ്വകാര്യാശുപത്രിയിൽ എത്തിച്ചു. ജോണിന്റെ ആറ് വാരിയെല്ലുകൾ ഒടിഞ്ഞ് ആന്തരിക അവയവങ്ങളിൽ തറച്ചുകയറി. രക്തസ്രാവത്തെ തുടർന്ന് അടിയന്തിര ശസ്ത്രക്രിയ നടത്തി. തീവ്രപരിചരണ വിഭാഗത്തിൽ കഴിയുന്ന ജോണിന്റെ ആരോഗ്യനില ഗുരുതരമാണ്. ഒളിവിൽപോയ ജോസിയെ കറുകച്ചാൽ പൊലീസ് ബുധനാഴ്ച ശാന്തിപുരത്തു നിന്നാണ് പിടികൂടിയത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.