ചങ്ങനാശേരി: നാട് ഒരുമിച്ചപ്പോൾ മാടപ്പള്ളി പഞ്ചായത്ത് ഏഴാം വാർഡിലെ 13 കുടുംബങ്ങളുടെ സ്വന്തം വഴിയെന്ന ആഗ്രഹം യാഥാർത്ഥ്യമായി. നാട്ടുകാരുടെ പൂർണ്ണ സഹകരണത്തോടെ രണ്ടു ദിവസം കൊണ്ട് പത്തടി വീതിയിൽ 800 മീറ്റർ റോഡാണ് വെട്ടി പൂർത്തീകരിച്ചത്. വാഴൂർ റോഡിനെയും പെരുമ്പനച്ചി -തോട്ടക്കാട് റോഡിനെയും ബന്ധിപ്പിക്കുന്ന ചൂരനോലി- വഴീപ്പിടിക റോഡിൽ എത്താൻ കഴിയുന്ന തരത്തിൽ ഓവേലിപ്പടിക്കൽ - മാമ്പറമ്പ്പടി വരെയാണ് റോഡ് വെട്ടിയത്. റോഡിന് നാട്ടുകാർ എസ്.എച്ച് റോഡെന്നു നാമകരണവും ചെയ്തു.

നടപ്പാത മാത്രമാണ് ഇവർക്ക് ഉണ്ടായിരുന്നത്. വാഹനമോ കുടിവെള്ളമോ വീട്ടിൽ എത്തിക്കുന്നതിന് കുടുംബങ്ങൾ വളരെ ബുദ്ധിമുട്ടിയിരുന്നു. വാർഡ് മെമ്പർ അഡ്വ സോജൻ പവിയാനോസിന്റെ ഇടപെടലിലൂടെയാണ് നാട്ടുകാർ ഒത്തൊരുമിച്ചു വഴിയ്ക്കു സ്ഥലം വിട്ടു നൽകിയത്. ഇതോടെ പതിറ്റാണ്ടുകളായുള്ള ഇവരുടെ സ്വപ്നമാണ് യാഥാർത്ഥ്യമായത്. റോഡ് കോൺക്രീറ്റ് ചെയ്യുവാനുള്ള നടപടികളും ആരംഭിച്ചുകഴിഞ്ഞു. തോമസ് വി ഓലിക്കര അധ്യക്ഷത വഹിച്ച റോഡ് ഉദ്ഘാടന ചടങ്ങിൽ ഒ.വി ആന്റണി ഓലിക്കര, ജോസഫ് എ. ഓലിക്കര, ജിജി പഴയചിറ, റെജിമോൻ, എം. എൽ മത്തായി മാന്തറ, കുട്ടപ്പായി മാന്തറ എന്നിവർ പങ്കെടുത്തു.