വൈക്കം : കാർഷിക ബില്ലിനും ലേബർ കോഡിനും ശേഷം കൊവിഡ് കാലത്ത് വൈദ്യുതി വിതരണ മേഖലയെ വിറ്റുതുലയ്ക്കുന്ന നടപടികളുമായി മുന്നോട്ട് പോകുന്ന കേന്ദ്രനിലപാട് തിരുത്തണമെന്ന് കേരള ഇലക്ട്രിസി​റ്റി ഓഫീസേഴ്‌സ് കോൺ ഫെഡറേഷൻ സംസ്ഥാന പ്രസിഡന്റ് എം.വി. മനോജ് ആവശ്യപ്പെട്ടു. രാജ്യത്തെ ഊർജ്ജ മേഖലയെ തകർക്കാനുള്ള നീക്കവുമായി മുന്നോട്ടു പോയാൽ ജനങ്ങൾക്ക് ഇന്ന് ലഭിക്കുന്ന പല ആനുകൂല്യങ്ങളും നഷ്ടമാകുമെന്ന് അദ്ദേഹം പറഞ്ഞു. കേരള ഇലക്ട്രിസി​റ്റി ഓഫീസേഴ്‌സ് കോൺഫെഡറേഷൻ ജില്ലാ കമ്മ​റ്റി സംഘടിപ്പിച്ച വെബിനാർ ഉദ്ഘാടനം ചെയ്യുകയായിരുന്നു അദ്ദേഹം. ജില്ലാ ഭാരവാഹികളായ അബ്ദുൾ റഷീദ്, ​ടി.പി.സുനിൽ, കെ.ഐ സോണിച്ചൻ, കെ.ആർ രാജേഷ് തുടങ്ങിയവർ പ്രസംഗിച്ചു.